Олон улсын номын баярын өдөр нэгэн бүтээл "төрсөн" талаар таатай мэдээ байна. МҮОНТ-ийн ахмад сэтгүүлч Хэл шинжлэлийн ухааны доктор, профессор Б.Нацагдорж "Баялаг бүтээгч" номоо дуусгаж, энэ сарын 23-нд өлгийдөн авч, олон нийтэд танилцуулах гэж байна.

Масс агентлагийн хэрэгжүүлж буй "Баялаг бүтээгчдийг дэмжинэ" төслийг хөндлөнгөөс ажиж суусан нэрт сэтгүүлч Б.Нацагдорж монголчууд юу хийж, ямар зүйл бүтээж буйг хараад бахархан суудаг байж.

Баялаг бүтээгчдийн чадвар, ур ухаан шингэсэн бүтээгдэхүүн хэрхэн бүтэж, ямар замналаар хэрэглэгчийн гар дээр очиж буй нь Б.Нацагдорж сэтгүүлчид өдрөөс өдөрт өсөн дэвжиж буй энэ салбарын талаар бичих сэдэл өгсөн аж. Сонирхон судалсаар Баялаг бүтээгчдийг дэмжих Монголын анхны солонгорсон холбоо байдгийг дуулж, баялаг бүтээгч иргэдтэй хэрхэн хамтарч ажилладаг болохыг олж мэджээ.

Монгол Улсын баялаг бүтээгч иргэд хэрхэн дэвжин дээшилж буй, монголчууд юу хийдэг байсан, хийж байгаа болон цаашид  хэрхэн хамтарч, ямар амжилтанд хүрч болохыг энэ номноос уншиж болох нь. Номын цагаан буян мөнх орших болтугай.