m.mn
түрүүлж мэдээлнэ
Архив
2016.06.24 08:45
63
Зуслангийн газар өмчлөл 20 гаруй хувьтай байна

Нийслэлийн хэмжээнд өмнө нь эзэмшиж байсан зуслангийн газрыг өмчлүүлэх ажлыг 2016 оны дөрөвдүгээр сарын 18-нд албан ёсоор эхлүүлсэн. Өмчлүүлэх ажлыг цахим хэлбэрээр болон цаасан хэлбэрээр Чингэлтэй, Сүхбаатар дүүргүүдэд явуулж байна. Чингэлтэй дүүргийн хувьд эзэмшиж байсан газрыг нь өмчлүүлэх боломжтой 200 гаруй материалыг хүлээн авч захирамжийн төсөлд танилцуулахад бэлдэж байгаа бөгөөд 1800 орчим хүсэлтийг цахимаар хүлээн авсанаас 800 иргэний эзэмшлийн зуслангийн газрыг судлаж үзэн боломжтой, боломжгүй гэсэн хариуг өгчээ. Харин Сүхбаатар дүүргийн хувьд өмчлөх боломжтой 210 материалыг цаасаар авч өмчлөлийн шатанд шилжүүлсэн, цахим системээр 3200 хүсэлт ирснээс 2000 гаруйд нь боломжтой, боломжгүй гэсэн хариу өгсөн гэж Нийслэлийн Өмчийн харилцааны газраас мэдээллээ.

Өнөөдрийн байдлаар зуслангийн өмчлөлийн ажил 20 гаруй хувьтай байна


Зуслангийн газрын өмчлөл эхэлсэн цагаас хойш нийт ирүүлж байгаа өргөдөл , хүсэлтээс харахад бичиг баримтын зөрчилтэй буюу тухайн эзэмшиж байгаа газрынхаа баталгаажсан хэмжээнээс хэтрүүлэн хашаа барьсан, газрын төлбөрөө төлөөгүй удсан, орц гарц хаасан гэх мэт зөрчлүүд зонхилж байгаа юм байна.  Дээрхи хоёр дүүргийн нэр бүхий 26 амны өмчлөх боломжтой 18 216 нэгж талбар буюу иргэний газрыг өмчлүүлэх ажил ирэх есдүгээр сар хүртэл үргэлжилнэ. Өнөөдрийн байдлаар зуслангийн өмчлөлийн ажил 20 гаруй хувьтай байна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.