m.mn
түрүүлж мэдээлнэ
Архив
2016.09.14 07:42
647
101/105, 102, 103 тусгай дугаар руу тоглож эсвэл шалтгаангүйгээр олон удаа залгавал хуулийн хариуцлага хүлээлгэнэ

101/105, 102, 103 тусгай дугаар руу тоглож эсвэл шалтгаангүйгээр олон удаа залгасан тохиолдолд хуулийн хариуцлага хүлээлгэнэ.

Цагдаагийн ерөнхий газрын Мэдээлэл, шуурхай удирдлагын төв нь гал түймэр, гамшиг осол, аврах ажиллагааны дуудлага, мэдээллийг 101, 105, гэмт хэрэг, зөрчил, зам тээврийн ослын дуудлага, мэдээллийг 102, эмнэлгийн яаралтай тусламжийн дуудлага, мэдээллийг 103 тусгай дугаарын утсуудаар хүлээн авч, шуурхай удирдлага зохицуулалтаар ханган ажиллаж байна. 
Тус төвд 2016 оны эхний 8 сард бүртгэгдсэн дуудлага, мэдээллийн:
˗ 101, 105 тусгай дугаарын утсанд 130.000 иргэн хандсанаас 71 хувийг,
˗ 102 тусгай дугаарын утсанд 1.004.000 иргэн хандсанаас 19 хувийг,
˗ 103 тусгай дугаарын утсанд 933.744 иргэн хандсанаас 17 хувийг тоглож залгасан дуудлага эзэлж байна.
Тусгай дугаарууд руу тоглож залган ачаалал үүсгэж, тухайн агшинд яаралтай тусламж шаардлагатай байгаа иргэдийн дуудлагыг хүлээн авах үйл ажиллагаанд хүндрэл учруулахын зэрэгцээ хүүхдүүд тоглосон дуудлага дээрх дуудлагын 80 хувийг эзэлж байна.
Түүнчлэн бага насны хүүхэд гэлтгүй иргэд тусгай дугаарт андуурч залгах, өөрсдийн эзэмшиж байгаа гар утсандаа хайхрамжгүй хандсаны улмаас халаасан дахь утасны товчлуур дарагдах зэргээр холболт үүсгэдэг.

Та болон таны нэр дээр бүртгэлтэй утасны дугаараас тусгай дугаарын 101/105, 102, 103 утсанд 3-с олон удаа тоглож, эсвэл шалтгаангүйгээр залгасан дуудлага бүртгэгдсэн тохиолдолд Захиргааны хариуцлагын тухай хуулийн 30 дугаар зүйлийн 30.2 дахь хэсгийг үндэслэн хариуцлага тооцохыг анхааруулж байна.
(30.2 дахь хэсэг: Цагдаагийн алба хаагч, туслах ажилтны хууль ёсны шаардлагыг зориуд үл биелүүлсэн, биелүүлэхгүй байхыг уриалсан, эсэргүүцсэн, албан үүргээ биелүүлэхэд нь санаатайгаар саад учруулсан, албан үүрэгтэй нь холбогдуулан цагдаагийн алба хаагч, түүний гэр бүлийн гишүүн болон чөлөөнд гарсан цагдаагийн ажилтныг доромжилсон, гүтгэсэн, заналхийлсэн, хүч хэрэглэсэн нь эрүүгийн хариуцлага хүлээлгэхээргүй бол 5000-20000 төгрөгөөр торгох, эсхүл 7-14 хоногийн хугацаагаар баривчлах шийтгэл ногдуулна)

                      


МЭДЭЭЛЭЛ ШУУРХАЙ УДИРДЛАГЫН ТӨВ