Зуны улирал эхэлж байгаатай холбогдуулан нийслэлийн авто тээврийн шалган бүртгэх товчоодын ачаалал эрс нэмэгджээ. Тиймээс хөдөлгөөний эрчим өндөртэй үед тээврийн хэрэгслийг 2-3 гарцаар нэгэн зэрэг нэвтрүүлэх зохицуулалт хийхээр болсон байна.

Яармаг, Баянзүрх, Баруунтуруун, Эмээлтийн шалган бүртгэх товчоод нь Нийслэлийн авто замын хөгжлийн газрын харьяанд үйл ажиллагаа явуулдаг аж. Эдгээр товчоодоор Улаанбаатар хот руу нэвтрэх хөдөө орон нутгийн дугаартай тээврийн хэрэгслээс авто зам ашигласны төлбөрийг хураан авч, нийслэлийн замын санд төвлөрүүлдэг. Мөн Улаанбаатар хотын дугаартай, 3.5-аас дээш тонн даацтай тээврийн хэрэгслээс 2000-5000 төгрөгийн хураамж авч байгаа юм байна.