Украины Ерөнхийлөгч Володимир Зеленский Оростой шууд яриа хэлэлцээ хийхэд бэлэн, гэхдээ зөвхөн гал зогсоосон тохиолдолд ярилцана хэмээн өчигдөр мэдэгджээ. АНУ, Франц, Герман, Европын холбоо, Украины төлөөлөгчид яг энэ асуудлаар өнөөдөр Лондонд уулзаж байгаа. “Энэ уулзалтаар манай баг болзолгүйгээр гал зогсоох, эс бөгөөс хэсэгчлэн гал зогсоох асуудлыг хөндөнө” хэмээн Зеленский хэллээ. Украины тал иргэний байгууламжийг пуужин, дроноор довтлохгүй байх санал тавьсан, одоо Москвагийн зүгээс тодорхой хариу хүлээж байна хэмээн тэрээр онцлов. “Украин улс болзолгүйгээр гал зогсооход бэлэн байна. Гал зогсоох гэдэг нь манай газар нутаг довтолгоонд өртөхгүй гэсэн үг. Тэгвэл бид мөн л адилхан хариу барина. Хэрвээ хэсэгчлэн гал зогсоовол бид зохих хариуг нь өгөхөд хэзээд бэлэн байх болно. Эрчим хүчний салбарыг довтлохгүй бол бид ч мөн эрчим хүчний салбарыг довтлохгүй. Оросууд алсын тусгалтай пуужин ашиглахгүй бол бид бас алсын тусгалтай пуужин ашиглахгүй” хэмээн Украины лидер ярьж байна. Украины тал ямар ч хэлбэрээр ширээний ард суухад бэлэн, гагцхүү гал зогсоосон тохиолдолд л ийм юм болно гэдгийг тэрээр дахин санууллаа. АНУ-ын Ерөнхийлөгч Дональд Трамп Украины асуудлаар энэ долоо хоногт тохиролцоонд хүрнэ хэмээн найдаж буйгаа өнгөрсөн амралтын өдрөөр илэрхийлсэн. Өнөөдөр Лондонд эхэлж байгаа уулзалтаас нааштай үр дүн гарч магадгүй хэмээн тоймч, ажиглагчид үзэж байна.