ОХУ-ын Ерөнхийлөгч Владимир Путин тавдугаар сарын 11-ний орой телевизээр шууд мэдэгдэл хийхдээ Украинтай 2022 оны хавар Стамбулд хийгээд тасалдсан шууд яриа хэлэлцээг сэргээх санал дэвшүүлсэн юм. “Бид Украинтай үнэхээр нухацтай яриа хэлэлцээ хиймээр байна. Мөргөлдөөний анхны шалтгааныг арилгаж, урт удаан бат бэх энх тайван тогтоох санаа агуулж байна. Мөргөлдөөний шинэ үе шатны өмнө түр гал зогсоох биш, харин бат бэх энх тайвны суурийг бий болгох яриа хэлэлцээг ямар нэг урьдчилсан нөхцөл, болзолгүйгээр хийе. Бид саналаа ширээн дээр тавилаа, одоо Украины тал шийдэх л үлдлээ” хэмээн Путин уриалав. Оросын төлөөлөгчид тавдугаар сарын 15-нд Туркт очно хэмээн мэдэгдлээ. АНУ-ын Ерөнхийлөгч Дональд Трамп Украины талд хандаж Туркт очиж Оростой шууд хэлэлцээ хийхийг уриалжээ. Украины лидер Зеленский ч зөвшөөрч “Туркт очоод Путинийг хүлээнэ. Түүнтэй биечлэн уулзая” хэмээн мэдэгдлээ. АНУ-ын Төрийн нарийн бичгийн дарга Марко Рубио бас 15-нд Туркт очно, гэхдээ тэрээр дээрх хэлэлцээнд оролцохгүй, НАТО-гийн уулзалтад очих юм. “Дипломат яриа хэлэлцээнд зайлшгүй шаардлагатай урт удаан, бүрэн гал зогсоохыг бид хүлээж байна. Аллагыг сунжруулах утга учир алга. Дөрөв дэх өдөр Туркт очоод Путинийг биечлэн хүлээх болно. Энэ удаа оросууд бултах шалтгаан эрж олохгүй байх гэж найдаж байна” хэмээн Зеленский бичжээ.