Стамбул дахь хэлэлцээнд Оросын Ерөнхийлөгч Владимир Путин хүрэлцэн ирнэ гэдэгт итгэж буйгаа АНУ-ын Ерөнхийлөгчийн тусгай элч Кит Келлог Fox News-т ярилцлага өгөхдөө илэрхийлэв. Энэ тохиолдолд Америкийн лидер Дональд Трамп мөн Туркт ирнэ хэмээн тэрээр нэмж хэллээ. Стамбулд Украины удирдагч Зеленский ирнэ гэдгийг Келлог батлаад “Путин ирвэл итгэмээргүй чухал уулзалт” болно хэмээн мэдэгдэв.

 

Украины хямралыг зохицуулах яриа хэлэлцээнд оролцох шаардлагатай нэрсийн жагсаалтыг Вашингтон гаргасан гэж байна. Ямартай ч эхлээд бүрэн гал зогсоох хэрэгтэй, дараа нь газар нутгийн асуудлыг ярилцаж болно хэмээн АНУ үзжээ. Келлогийн хэлж буйгаар, Москва, Киев хоёр тодорхой буулт хийх ёстой. “Хэлэлцээ санаснаар болохгүй нь ойлгомжтой. Хэзээ ч тийм юм байдаггүй, гэхдээ зарим буулт хийх хэрэгтэй. Буулт хийж байж л дайн байлдааныг зогсооно” хэмээн Келлог хэллээ. Украины газар нутаг дээр, Днепр мөрний баруун талд Их Британи, Франц, Герман, Польшийн цэргийг байрлуулах асуудлыг АНУ хэлэлцэж байгаа, мөн Запорожийн цөмийн цахилгаан станцын удирдлагыг шилжүүлэн авч ашиглалтад нь туслах хувилбарыг судалж байгаа гэв. Стамбул дахь хэлэлцээгээр ямар нэг ахиц дэвшил гарахгүй бол Москвагийн эсрэг хамгийн хатуу хориг арга хэмжээ авна хэмээн Келлог анхаарууллаа.

 

Кремлийн хэвлэлийн төлөөлөгч Дмитрий Песков “Оросын төлөөлөгчид тавдугаар сарын 15-нд Стамбулд очиж Украины талыг хүлээх болно” хэмээн мэдэгдлээ. Оросын төлөөлөгчдийг ОХУ-ын Ерөнхийлөгчийн зөвлөх Владимир Мединский ахлахаар болжээ. Харин Украины талаас Андрей Сибига ахалж хэлэлцээ хийнэ. Туркт очоод байгаа АНУ-ын Төрийн нарийн бичгийн дарга Марко Рубио Орос-Украины хэлэлцээ дууссаны дараа талуудтай уулзахаар төлөвлөжээ.