БНХАУ-ын Улаанхад хотод Ханшань уулын үүлдэрийн цагаан ямааны ноолуурыг брэнд болгосон Dongli ноолуурын үйлдвэрээр Монгол Хятадын сэтгүүлчдийн сурвалжлах баг зочилж мэдээ сурвалжлага бэлтгэлээ.

Хятад улсын Ханшань мужийн цагаан ямааны ноолуур нь нарийлаг чанарын хувьд 13-16 микрометр, 36 мм-ээс дээш урттай буюу монгол ямааны ноолууртай ойролцоо боловч бүтээгдэхүүн үйлдвэрлэлээрээ тус компани дэлхийд нэлээд дээгүүрт ордог байна.

Дунли ноолуурын үйлдвэр 2000 онд үйл ажиллагаагаа эхлүүлсэн бөгөөд өдгөө 1500 ажилтантай, бүрэн автоматчилагдсан, 10000 гаруй нэр төрлийн бүтээгдэхүүн үйлдвэрлэж, дотоодын хэрэгцээнд нийлүүлэхээс гадна, гадаадын 30 улсын 40 гаруй хувцас үйлдвэрлэгч компаниудад бүтээгдэхүүнээ нийлүүлэхийн зэрэгцээ Италийн брэнд компанитай хамтран ажиллаж, үйлдвэрлэсэн бүтээгдэхүүнийхээ 65 хувийг Итали зэрэг Европын улс орнууд руу экспортлодог байна.

Тус үйлдвэрийн барилга руу явж ороход үйлдвэрийн ханаа Улаанхад уулын өнгөтэй адил өнгөөр будсан, чийдэнгийн бүрхүүлээ самнасан ноолуураар бүрхсэн, цонхны хөшигөө ноолууран утсаар шийдсэнээс гадна ханандаа өлгөсөн том жижиг олон фото мэт зургийг ноолууран шэйлээр урласан нь сэтгүүлчдийн сонирхолыг татаж байлаа. Мөн тус компани технологийн чиглэлийн дунд, дээд мэргэжлийн сургуулиудтай хамтран, тэнд суралцагчдаас ажилтан сонгон сурган авч, үйлдвэрийнхээ боловсон хүчнийг бэлтгэдэг аж.

Дашрамд сонирхуулахад тус компанийн бүтээгдэхүүний үнэ манай улсын ноолруун үйлдвэр болох “Говь” компанийн бүтээгдэхүүнээс харьцангуй өндөр үнэтэй нь анзаарагдаж байлаа.