Нийгэм
2025.07.29 16:44
3034Бусдыг бүлэглэн зодож, оргон зайлсан Б.Амарсайханы гадаад паспортыг хүчингүй болгожээ
Энэ сарын 18-19нд шилжих шөнө Сүхбаатар дүүргийн 3-р хороонд хар тамхи, мансууруулах бодис хэрэглэсэн үедээ бусдын биед бүлэглэн халдаж хүнд гэмтэл учруулсан хэрэгт сэжиглэгдэн шалгагдаж байх үедээ БНСУ руу “оргон зайлсан” Говь ХК ны гүйцэтгэх захирал Б.Амарсайханы гадаад паспортыг хүчингүй болгосныг албаны эх сурвалж хэллээ.
Сэжигтэн (яллагдагчаар татсан тогтоолтойгоо танилцаагүй байгаа) Б.Амарсайхантай өмгөөлөгчөөр нь дамжуулан цагдаагийнхан холбогдсон бөгөөд “Нэн даруй буцаж ирэхийг шаардаж, эрх зүйн байдал нь өдөр ирэх бүрд дордож байгааг сануулжээ”.
Цагдаагийн байгууллага Б.Амарсайханыг олон улсад эрэн сурвалжилж буй зар мэдээллийг Интерполын улаан буланд байршуулах хүсэлтээ энэ сарын 24-нд өгсөн байна. Харин прокурорын зөвшөөрөл гарсан даруйд уг зар нийтлэгдэх аж.
Харин Э.Тэмүүлэн, Ц.Санжаачойпэл нар 30 хоног цагдан хорих шийдвэр гараад байгаа юм.
