Нэмэгдсэн өртгийн албан татварын хоёрдугаар улирлын буцаан олголт долоодугаар сарын 28-аас эхлэн иргэдийн дансанд орж эхэлсэн.

Өнөөдрийн байдлаар 1,300,000 иргэнд 91.5 тэрбум төгрөгийг олгосон байна.

Зарим иргэдийн буцаан олголт ороогүй болон буурсан дүнтэй олгогдсон гэх асуудлаар Татварын Ерөнхий газрын ТХУАЗГ-ын Орлогын хяналт, буцаан олголтын хэлтсийн дарга Д.Тунгалагаас тодрууллаа. 

Тэрээр "Буцаан олголт нь ороогүй иргэд И баримт аппликешнээр дамжуулан буцаан олголтын төлөвөө хянах хэрэгтэй. Зарим дүн нь хянагдаж байна гэсэн бичигтэй байвал буцаан олголт буурч орсон байгаа. 

Татварын албанаас өндөр үнийн дүнтэй буцаан олголтыг хянах үйл ажиллагааг явуулдаг. Өндөр үнийн дүнтэй буюу 10 сая төгрөгөөс дээш үнийн дүнтэй худалдан авалтад хяналт шалгалт хийдэг. Үүнд ихэвчлэн үл хөдлөх хөрөнгө болон авто машин зэрэг хамаардаг.

Хуульд иргэн өөрийн хэрэгцээний баримтын буцаан олголтыг авна гэж заасан байдаг. Татвар төлөгчдийн гаргаж буй алдаа нь өөрийнхөө худалдаж авсан хөрөнгийн баримтыг өөр хүний нэр дээр бүртгүүлсэн байдаг. Энэ тохиолдолд буцаан олголт олгогдохгүй байх нөхцөл үүсч байна.

Өндөр үнийн дүнтэй худалдан авалт хийвэл тухайн хөрөнгийн эзэмшигч нь нэр дээрээ баримтаа бүртгүүлэх ёстой. 

Жишээ нь хүү нь автомашин худалдаж аваад баримтыг нь ээж нь бүртгүүлсэн бол бид харилцан хамаарлыг нь судалж үзээд тодорхойлсны дараа системээс баталгаажуулна. Хэрвээ гэр бүлийн хоёр гэрлэлтээ батлуулаагүй бол хянагдаж байна гэсэн төлөвтэй болно гэсэн үг. Энэ тохиолдолд заавал татварын алба дээрээ очиж баталгаажуулах хэрэгтэй. Иймд иргэд баримтынхаа төлөвийг ажиглах чухал. 

Энэ жилээс IBAN дугаар ашиглаж эхэлснээс үүдэн хоёрдугаар улирлын буцаан олголтоос 560 иргэн буцаагдсан.

Иймд иргэд "И баримт" аппликешнийнхээ дансны бүртгэлийг заавал хянаарай. Дансны бүртгэл нь зөв бичигдсэн боловч банкин дээрх мэдээлэл зөрүүтэй байж болно. Хэрвээ хоёрдугаар улирлын буцаан олголт нь буцаагдсан төлөвт орсон бол дансны мэдээллээ засварлаад дахин баталгаажуулалт хийх хэрэгтэй" гэв.

Шууд дамжуулалтыг үзэх: