Ардчилсан намын Улс төрийн зөвлөлийн ээлжит хуралдаан энэ сарын 20-ны өдөр болж, тус намын дарга Л.Гантөмөр Үндэсний бодлогын хороог энэ сарын 28-ны өдөр хуралдуулахаар зарласан. Уг хурлаар Ардчилсан намын Үндсэн дүрэм болон хөтөлбөр, намын дотоод зохион байгуулалтын асуудлыг хэлэлцэх юм. Тэгвэл Ардчилсан намын дараагийн дарга хэн бэ?

Намын даргын сунгаанд УИХ-ын гишүүн О.Цогтгэрэл, Ч.Лодойсамбуу, Л.Мөнхбаясгалан нарын нэр хүчтэй яригдаж байна. Энэхүү марафонд хэн ялбал Ардчилсан нам хийгээд ард түмэн хожих вэ?

Ардчилсан нам өдийг хүртэл шуудайнд хийсэн үхрийн эвэр мэт байгаа шалтгаан нь залуу үеэ дэмждэггүй, халаагаа өгөхийг хүсдэггүй, намын удирдлагууд. Тиймдээ ч хүчтэй сөрөг хүчин байж чаддаггүй гэхэд хилсдэхгүй. Сөрөг хүчний үүрэг гүйцэтгэх ёстой намын дарга нь эрх баригчидтайгаа эвсэж, нэг хөнжилд орсон нь дотоод тэмцлийг улам хурцдуулав.

Намдаа шинэчлэл хийж, салхи оруулъя л гэвэл залуу боловсон хүчин, хүчтэй дуу хоолой болох харизмтай нэгнийг намын даргаар сонгох хэрэгтэй. Тэгж гэмээ нь олон жил бугшсан идээ бээрийг шахаж, ах намын эсрэг дорвитой хөдлөх боломж бүрдэнэ.

Горилогчдоос О.Цогтгэрэл хоёр парламент дамжиж УИХ дахь намын бүлгээ удирдсан туршлагатай ч хүчтэй сөрөг хүчин байж чадаагүй. Удирдагчийн харизм ч бас дутагдах талтай. Харин Л.Мөнхбаясгаланг Х.Баттулгын фракц гэдгийг бүгд мэднэ.Нөгөөтэйгүүр энэ том айлыг эмэгтэй хүн эмхэлнэ гэдэг юу л бол.

Даргын марафонд өрсөлдөж байгаа гишүүдээс хамгийн харизмтай нь Ч.Лодойсамбуу. Ах нарын дотоод хагарал, суудлын төлөөх тэмцэлд цэг тавьж, сөрөг хүчний үүргээ дорвитойхон биелүүлэх болов уу гэсэн хүлээлт намын гишүүдийн дунд бий.Тиймдээ ч итгэл хүлээлгэж байгаа гэх. Ямартай ч Ардчилсан намын даргын сунгаа олны анхааралд байсаар байна.