Баянзүрх дүүргийн “Дарь-Эх” цогцолборын нээлт өчигдөр /2025.08.23/ боллоо. Нээлтэд Баянзүрх дүүргийн Засаг даргын Тамгын газрын Нийгмийн хөгжлийн хэлтэс, БНСУ-ын төрийн бус байгууллагуудын төлөөлөл оролцов.

Мөн үеэр Гэмтэл Согог Судлалын үндэсний төвтэй хамтарсан “Face 820” арга хэмжээг дөрөв дэх жилдээ зохион байгуулсан юм.  Энэхүү арга хэмжээ нь санамсар болгоомжгүй, гэнэтийн байдлаар түлэгдсэн хүүхдүүдэд чиглэсэн бөгөөд өнгөрсөн дөрвөн жилийн хугацаанд түлэгдэлтэй гурван хүүхдийг Солонгос улсад эмчлүүлж амь насыг нь аварч байжээ.

Өдөрлөгийн үеэр Солонгос үндэсний тоглоом, Солонгос үндэсний хоол амталгаат худалдаа, хандивын худалдаа, Монгол-Солонгосын хамтарсан урлагийн тоглолт боллоо.

Түүнчлэн арга хэмжээний үеийн бүх орлогыг түлэгдэлтэй өвчтөнүүдийн эмчилгээний зардалд хандивлаж байгаа бөгөөд ГССҮТ-ийн эмч нар болон Солонгосын Каннас Сонсим эмнэлгийн эмч нарын хамтарсан үзлэг оношилгоо хийсэн юм.   

“Дарь-Эх” цогцолбор нь Баянзүрх дүүргийн 2, 21, 27, 29 дүгээр хороонд байрладаг. Энэ орчныг тохижуулж  дугуйн зам, явган зам, гүйлтийн зам бүхий томоохон талбайг тохижуулсанд ойр орчмын оршин суугчид баяртай байгаагаа илэрхийлж байв.

Энэхүү үйл ажиллагааны хүрээнд тус цэцэрлэгт хүрээлэнд 300 мод тарьж, цаашид ногоон байгууламжийг нэмэгдүүлэх юм байна.