Ардчилсан намын үндэсний бодлогын хороо энэ сарын 28-нд хуралдана. Уг хуралдаанаар Ардчилсан намын Үндсэн дүрэм болон хөтөлбөр, намын дотоод зохион байгуулалт, цаашлаад намын дараагийн дарга хэн байх вэ гэдэг асуудал ч мөн яригдах юм.

Намын дарга Л.Гантөмөр “Дараагийн намын дарга намаа хүчтэй, эвтэй байлгахад ур ухаан гаргадаг хүн байгаасай гэж хүсэж байна” гэдгээ намын нөхдөдөө илэрхийлсэн. Арга ч үгүй. Олон жил шуудайнд хийсэн үхрийн эвэр мэт байсан нам эвлэлдэн нэгдэж гэмээ нь хүчтэй сөрөг хүчин, чанга дуу хоолой болж чадна. Үүгээрээ ч өнөөх олигарх улс төрчид биш боловсролтой, мэдлэгтэй нэгэн хэрэгтэй гэдгийг хэлээд авсан.

Намын даргад нэр дэвшихээр горилж буй хүмүүсийн жагсаалтын эхэнд О.Цогтгэрэл, О.Алтангэрэл, Л.Мөнхбаясгалан, Ч.Лодойсамбуу нарын нэр яригдаж байгаа. Үүнд намын зарим гишүүд шүүмжлэлтэй хандаж буй. Учир нь олон жил улс төрөөр шоу хийж, хувийн амбицаа хөөсөн гишүүдэд итгэл үзүүлэхийг хүсээгүй бололтой. 

Ардчилсан нам эрдэмтэн судлаачдаа урдаа барьж судалгаанд суурилсан, бодлогын нам болох ёстой.

Энэ шалгуураар бодохоор намын даргад УИХ-ын гаднаас гадаадад өндөр боловсрол эзэмшсэн дэлхийн түвшний хүнийг сойх ёстой юм шиг. Тийм залуучуудын нэг бол Доктор Бархүүгийн Отгонбат юм. Тэрээр  АН-ын үндэсний зөвлөлдөх хорооны гишүүнээр 2007 оноос хойш 18 жил ажилласан туршлагатай нэгэн. Улс төрд тийм ч туршлагагүй хүн биш. 2008 онд УИХ-д нэр дэвшиж байсан, сонгуулийн тоос үзсэн нөхөр.

Тэрээр “Глобал Удирдагч” их сургуулийн үүсгэн байгуулагч, Ерөнхийлөгч бөгөөд “Америкт суралцах боломж”, “Тагтан дээр” зэрэг бестселлер номуудын зохиолч юм. Мөн 2016 онд Харвардын их сургуулийг төрийн удирдлагын магистр, 2025 онд АНУ-ын Ivy League холбооны гишүүн сургууль болох Пэннсильваний Их Сургуулийн боловсролын сургуульд боловсролын ухааны докторын зэрэг хамгаалсан. Диссертацийн сэдэв нь “Дэлхийн түвшний их сургуулийг бүтээх манлайллын загвар” бөгөөд цаашид АН-ын боловсролын бодлогын хөтөлбөрийг боловсруулах чадвартай боловсон хүчин юм. 

Цаашид энэ намыг хэн авч явах вэ гэдэг асуудал улс төр сонирхогчдын анхаарлыг ихээхэн татаж буй. Чухам үүний төлөө нам доторх фракцуудын тэмцэл ч сэрж, хөдөлгөөнд орж эхлэсэн. Аль нэг фракцын шахааны хүн биш мэдлэгтэй, боловсролтой, чадвартай нэгнийг сонгохыг ард түмэн ч шаардаж буй. Учир нь энд зөвхөн Ардчилсан намын асуудал биш улс эх орны ирээдүйн асуудал яригдаж байна.

Ардчилсан намын дарга хэн болохоос Монголын ардчилал, аюулгүй байдал ч шалтгаална.