АН-ын ҮБХ-ны хуралдаан үргэлжилж байна. Энэ үеэр тус хорооны гишүүн С.Баярцогтоос намын даргын талаар байр суурийг нь тодрууллаа.

ҮБХ-ны энэ удаагийн хуралаанаар ямар асуудлуудыг хэлэлцэж байна вэ?

Ардчилсан намын Улс төрийн зөвлөл энэ сарын 20-ны өдөр хуралдахад намын дарга Л.Гантөмөр саналаа оруулж ирсэн. Нэгдүгээрт, намын даргын асуудал, хоёрдугаарт, дүрэм, гуравдугаарт, мөрийн хөтөлбөр, үзэл баримтлалыг хэлэлцье гэсэн. Үүнийг хуралд оролцогсдын үнэмлэхүй олонх дэмжсэн. ҮБХ-ны хуралдаанаар хэлэлцэх байх.

Улс төрийн намын тухай хуулийн зарим заалтын хэрэгжилтийг жилээр хойшлуулсан байсан, дахиад жилээр сунгаж байх шиг байна. Бүх нам 2025 оны 12 дугаар сарын 31-ний өдрийн дотор дотоод дүрэм, мөрийн хөтөлбөр, үзэл баримтлалаа хуульд нийцүүлэн шинэчлэн батлах ёстой. Энэ бол тусдаа асуудал. Харин манай намын даргын тухайд, хамтарсан засгаас АН-ыг гаргасантай холбогдуулаад, намын даргын асуудал гарч ирж байгаа.

Танай намын зарим гишүүд эхлээд дүрмээ шинэчилж байгаад дараа нь намын даргаа сонгох ёстой гэсэн байр суурийг илэрхийлж байгаа. Таны хувьд энэ тал дээр ямар саналтай байгаа вэ?

Аливаа улс төрийн нам гэдэг бол амьд организм. Үйл ажиллагаа тасралтгүй өрнөж байх ёстой. Тэр утгаараа одоо мөрдөж байгаа дүрэм энэ оныг дуустал хүчинтэй. Намын дарга болон тавьж байгаа асуудал нь ч хүчинтэй. Өнөөдөр ҮБХ-гоор хэлэлцэж байгаа асуудлууд ч гэсэн хууль болон АН-ын дүрмийн дагуу хийгдэж байгаа.

Манай нам хоёр том хэсэгт хуваагдсан байсан. Энэ хуваагдал 2023 онд алга болсон бөгөөд бага багаар илааршиж байгаа. Ардчилсан намыг байгуулахад нэгдсэн таван намаас үүдэлтэй фракциуд үндсэндээ байхгүй болсон. Сүүлдээ нягтраад үзэл санаан дээр суурилсан, мөн насны онцлог, сонирхол дээр тулгуурласан фракци, клубүүд болон хувирч байгаа. Одоогийн байдлаар нам дотор фракцийн шинжтэй том хагарал, бодлогын зөрчилдөөн байхгүй. Нэрд дэвшигчид өөр өөрийн байр суурийг илэрхийлж байгаа. Энэ бол хувь хүний л байр суурь.

АН-ын даргыг сонгох журам гэж бий. Энэ журмаар намын даргад нэр дэвшигч нь ҮБХ-ны гишүүнээр багадаа дөрвөн жил ажилласан байх ёстой гэж заасан байгаа. Гэтэл зарим нэр дэвшигчийн тухайд энэ шаардлагыг хангахгүй байгаа...?

Хэн нэг хүн, ямар нэг үйл явдалд зориулж, намын дүрмийг өөрчлөх ёсгүй. Бүх нам институци болж хөгжих ёстой. Үүний тулд дүрмээ баримталдаг байх ёстой. Орж ирсэн хүн бүрд тааруулж дүрэм, журмаа өрчлөөд байх юм бол институци болж чадахгүй.

Та АН-ын даргад нэр дэвших үү?

Би 2023 онд намын даргад өрсөлдсөн. Тэгэхэд манай нам парламентад есхөн гишүүнтэй байсан. Одоо бол 42 гишүүнтэй болсон болохоор намын дарга  парламентын гишүүн байх ёстой гэсэн байр суурьтай байгаа болохоор би өрсөлдөхгүй.

Шууд дамжуулалт үзэх: