АН-ын даргад нэрээ дэвшүүлж, өрсөлдөх байр сууриа илэрхийлээд буй ҮБХ-ны гишүүн Б.Отгонбаттай ярилцлаа.

Та АН-ын даргад өрсөлдөнө гэдгээ мэдэгдлээ. Энэ шийдвэрийг гаргахад тань юу нөлөөлөв?

Өнөөдөр АН-ын хувьд өнөөдөр түүхэн өдөр тохиож байна. Намын дарга Л.Гантөмөр ажлаа тайлагналаа. Нам хоёр хуваагдсан, хэцүү үед нэгтгэж чадсанд нь бид талархалтай хандаж байгаа.

Өнгөрсөн хугацаанд манай нам хүтэй сөрөг хүчин болж чадсангүй. Одоо эрх баригчдыг хазаарлах ёстой. Ингэж байж, Ардчилсан нам ард түмнийхээ итгэлийг олж авна.

Миний хувьд АНУ-ын Пенсильваний их сургуульд докторын зэрэг хамгаалаад ирсэн. Энэ хугацаанд боловсролын реформ чиглэлээр нэлээд судалгаа хийлээ.

Өнөөдөр 70, 80-аад оныхон ачаа үүрэх цаг болсон гэж үзээд, миний бие намын даргад нэрээ дэвшүүлж байна. Бодлогын нам гэдэг бол бүх юм судалгаан дээр л суурилдаг байх ёстой. Өнөөдөр АН мөрийн хөтөлбөрөө боловсруулж эхэлж байна. Энэ процесст нь оролцъё, цаашилбал, ард түмэн юу хүсэж байгааг судалъя. Бизнесийн орчин маш муу байна. Залуучууд гадагшаа их явж байна. Монголд амьдрах сонирхолгүй болж байна. Агаарын бохирдол, замын түгжрэлээ яаж шийдэх юм бэ? Энэ бүгдийг судалгаан дээр суурилж шийдвэрлэх цаг болсон.

Миний бие 2008 онд нэр дэвшиж байсан. Түүнээс хойш УИХ-ын сонгуульд нэр дэвшээгүй. Өөрөө дээд сургууль ажиллуулдаг хүний хувьд хэлэхэд, бүх зүйл явж явж, боловсролтой л холбогддог. Мэдлэгт суурилсан, хүчтэй эдийн засгийг бий болгоё гэвэл эхлээд боловсролын салбартаа реформ хийх ёстой. Улс төрийн лидер гэгдэх хүмүүс бодитой бодлого дэвшүүлж чадахгүй байна. Эдийн засгийн өсөлт удаан байна. Гадаадын хөрөнгө оруулалт хамгийн доод түвшиндээ байна. Улс төрчдөд итгэх итгэл маш муу байна. Энэ бүх асуудлыг шийдвэрлэх бодлогыг АН гаргаж чадна гэдэгт би итгэж байна.

Шууд дамжуулалт үзэх: