АН-ын ҮБХ-ны гишүүн Ч.Лодойсамбуугаас хурлын явцыг тодруулж, хэлэлцэж буй асуудлуудаар байр суурийг нь сонирхлоо.

Хурлын уур амьсгал ямар байна?

Хурлын уур амьсгал маш тайван, ажил хэрэгч, эв нэгдэлтэй байна. Товчхондоо намын дүрмээ баталж, АН-ын дарга Л.Гантөмөрийн ажлаа өгөх өргөдлийг хэлэлцэж, шинэ даргаа сонгоно. Одоо дараагийн намын даргыг сонгох сонгуулийн товыг зарлаж, дотоод сонгуулийн хорооны бүрэлдэхүүнийг батална. Дөнгөж сая АН-ын даргыг сонгох журмыг танилцуулсан. Одоо бүрэлдэхүүнийг нь батлах гэж байна.

Сая намын даргыг сонгох журмыг танилцууллаа. ҮБХ-нд дөрвөн жил ажиллаагүй хүн нэр дэвших боломжгүй гэв. Тэгэхээр УИХ-ын гишүүн Л.Мөнхбаясгалан бид хоёр нэр дэвших боломжгүй боллоо.

Энэ журмыг Л.Гантөмөр даргыг намын даргаар сонгох үед хэрэглсэн, одоо хүчин төгөлдөр үйлчилж буй дүрмийн дагуу баталсан. Журамд өөрчлөлт оруулах талаар санал гарсангүй.

Та өөрөө өрсөлдөх боломжгүй боллоо. Тэгвэл нэр дэвшигчдээс хэнийг нь дэмжих вэ?

Улс төрийн намын зорилго бол ялалт байгуулах байдаг. Өнөөдрийг хүртэл эвлүүлэх гэж ядсан энэ намыг дотор нь хувааж гүйгээд байх сонирхол алга. Намын даргад өрсөлдөнө гэдгээ ил тод мэдэгдсэний дараа намын гишүүдээс асар их дэмжлэг байгааг харлаа. Энэ олон хүний дэмжлэгийг аль нэг тийш эргүүлж, маргааны шалтгаан болгомооргүй байна. Шаардлага хангаж өрсөлдөх нэр дэвшигчдээс хэн нь ч сонгогдсон, миний бие өөрийн мэддэг чаддаг бүхнээрээ дэмжин, хамтран ажиллах болно.

Тал тал тийш харсан намыг Л.Гантөмөр дарга яаж эвлүүлснийг өөрийн нүдээр харж байсан хүний хувьд, зарим тохиолдолд өөрөө тэр уулзалтуудыг зохион байгуулж байсан хүний хувьд хэлэхэд, энэ бол асар их тэвчээр, хөдөлмөр байсан. Тиймээс өнөөдөр намайг нэр дэвшүүлэхгүйн тулд ийм юм хийлээ гэсэн юм яримааргүй байна.

АН-ын даргыг МАН-аас захиалдаг гэдэг. Энэ тал дээр таны байр суурь...?

2021 оноос хойш энэ намын үйл ажиллагаанд оролцож явсан хүний хувьд хэлэхэд, тийм асуудал байхгүй. Энэ бол зохиомол. АН бол бие даасан нам. Одоо АН парламентад 42 гишүүнтэй. Тэднийг сонгоод гаргаад ирсэн ард түмэн байна. Одоо бидэнд тамга тэмдэгний асуудал үүсэх ёсгүй.

Ямар ч байсан бид эвлэж нэгдэж байгаад дүрмээ баталж, институци болох чиглэл рүүгээ явах ёстой. Хамгийн гол нь ялах нь чухал. Тэгж байж, монголын төр төр шиг болж, нийгэм энэ их зүдэргээнээсээ сална. Энэ миний итгэл үнэмшил. АН олигтойхон байгаад өгөөч гэсэн итгэл найдвар тасрахгүй байгаад байна, үүнийг бид алдаж болохгүй.