Ардчилсан намын ҮБХ-ны гишүүн М.Тулгатаас намын даргын сонгуулийн талаар байр суурийг нь тодрууллаа.

Дараагийн даргыг ямар хүн байгаасай гэж хүлээж байгаа вэ?

АН бол 2021-2023 онд нэлээд хүнд цаг үеийг туулсан. Тэр үед энэ намыг авч явж байсан гишүүдийн нэг нь би. Өнөөдөр нам маань талцдаг байдлаас холдож, илүү бүтээлч, эерэг уур амьсгал дунд хурлаа явуулж байна.

Намын даргын тухайд, одоо мөрдөгдөж байгаа дүрмийн дагуу даргаа сонгох нь зөв гэсэн байр суурьтай байгаа. Улс төрийн намын тухай хуулийн дагуу бид дүрмээ шинэчлэх ёстой. Энэ шинэчлэлийг шинээр сонгогдох дарга өөрөө манлайлаад хийх хэрэгтэй. Үлдэх хүнээр ачаа бүү татуул гэдэг шүү дээ. Өнгөрсөн сонгуулиудаас харахад, шинээр сонгогдсон дарга өмнөх даргын үед баталсан дүрмийн хүрээнд ажилласнаас болж ялагддаг байсан.

Нам дотроо хэр нэр хүндтэй, хэдий хэр санал багцалж чадсанаас хамаарч намын дарга сонгогдоод  байдаг. Гэтэл сонгуулиар ард түмнээрээ дүнгээ тавиулдаг. Тиймээс өнөөдөр хэн ард түмний дунд хэн нэр хүндтэй байна, хэн энэ намын нүүр царай болж чадах вэ гэдгийг харгалзан үзэх шаардлагатай. Үүнийг манай намын гишүүд маш сайн бодох ёстой. 2028 онд бид ялмаар байна. Тэгвэл хэн энэ намын нүүр царай болж, ард түмний дуу хоолойг гаргаж чадах юм бэ гэдгийг бодмоор байна.

Өнгөрсөн хугацаанд нам маань дүрэм дээрээ гишгэж ирсэн. Дараагийн даргаар дүрмээ баримталж чаддаг, үзэл санаа, үнэт зүйлийнхээ манаач байж чаддаг хүн сонгогдоосой гэж хүсэж байна.