Эмч нар юу юугүй ажил хаялт зарлах нь. Ажил хаялт зарлахаас өмнө гэрээ хэлэлцээрээ хийе хэмээж эмнэлгийн ҮЭ хэлж байгаа ч ЗГ,  УИХ-ын гишүүд 15 хувийн нэмэгдлээс өөр төсвийн орон зай байхгүй гэдэг дээр хатуу зогсчээ.  Улс мөнгө байхгүй гэж байгаа ч тойргоо услахад, бүсийн хөгжилд, зам барилгад 300 гаруй тэрбум  төгрөг гараад ирсэнд УИХ-ын гишүүн Ц.Сандаг-Очироос эхлээд эмч нар бүгд гайхсан. Иймээс эмч эмнэлгийн байгууллагын ажилтнууд “Биднийг ажил хаялт зарлаж чадахгүй хэмээн басч байвал эндүүрэл шүү.  13-нд ажил хаялт хийдгээрээ хийнэ” хэмээн мэдэгдэж байна.

Нөгөөтэйгүүр Эрүүл мэндийн сайд, УИХ-ын гишүүн Төсвийн байнгын хорооны дарга Х.Ганхуяг “ ЭМДС-аа цэгцэлснээр цалин илүү их нэмэх боломж бүрдэнэ. Даатгалын сан өөрөө шүүрэн шанага шиг байгаатай холбоотойгоос мөнгө нэмээд ч нэмэргүй, үргүй зардал гарч байна. ЭМДС өвчтөнд хүрэхгүй, гүйцэтгэлийн санхүүжилтээр цалинждагаас эмч нарт нэмэгдэл болж очихгүй байна”  гэх  тайлбарыг өгч байна.

 Их эмч н.Мөнхбатын хэлснээр “ЭМДС-д хулгай их байна. Иймээс энэ санг үргүй зараад байна гэж зарим УИХ-ын гишүүд яриад байна. Тэр  хулгайгаа та нар өөрсдөө илрүүл. Тэр хулгайг эмч нар илрүүлэх шаардлагагүй” гэх үнэн үгийг цөөн үгээр хэллээ. ЭМДҮЗ-ийн томилгоог хэн хийж, ЭМДС-д хэн хяналт тавих ёстой вэ. Өнөөдрийг хүртэл ЭМДС өр төлбөртэй явж ирсэн нь буруу томилгоо, улс төрийн буруу шийдвэртэй зуун хувь хамаатай. Хулгай дээрмийг улс төрчид өөрөө хийдэг ч эцэст нь энэ сангаас болж эмч эмнэлгийн ажилтны цалинг нэмэх боломжгүй гэх тайлбар нь өөрөө хэр оновчтой байна вэ.