Нийгэм
2026.01.22 12:17
999АН: Эрчим хүчний асуудалд эрх баригчид улс төрийн хариуцлага хүлээх ёстой
Ардчилсан намын 4/11 мэдээллийн цаг боллоо.
Мэдээллийн цагаар:
-Эрчим хүчний салбар дахь цаг үеийн нөхцөл байдал, авлигажиж ужгирсан тогтолцооны асуудал
-Эдийн засгийн эрх чөлөөний тухай хуулийн төсөл
-Гэрэгэ бодлого судалгааны хүрээлэнгийн талаарх мэдээллүүдийг өглөө.
УИХ-ын гишүүн Ө.Шижир "Эрчим хүчгүй, тоггүй нөхцөлд Улаанбаатарчууд амьдарч байна. Улс төрчид дандаа ирээдүй цаг дээр ярьдаг. Одоо худлаа амлалтад дахин итгэхгүй байх гэж найдаж байна. Эрчим хүчний аюулгүй байдал бүрэн алдагдсан гэж үзэж байгаа учраас Эрчим хүчний сайд Б.Чойжилсүрэн, Шадар сайд Т.Доржханд нарыг огцруулах шаардлагыг өнөөдөр өөрийн бланк дээр гарган Ерөнхий сайд Г.Занданшатарт хүргүүлнэ гэв.
Ардчилсан намын Нарийн бичгийн дарга, УИХ дахь Ардчилсан намын бүлгийн зөвлөх А.Батпүрэв "Эрчим хүчний үнэ 2016 оноос хойш 2.3 дахин нэмэгдсэн. Өнгөрсөн хугацаанд Цахилгаан станцууд 1 их наяд орчим төгрөгийн алдагдалтай ажилласан. Үүнийг иргэдийн татварын мөнгөөр төлж байгаа. Мөн 1.5 их наяд гаруй төгрөгийн гадаадын зээл тусламж, хөтөлбөрийг хэрэгжүүлсэн. Энэ бүхнийг тооцвол нэг айлд дунджаар 2 сая төгрөгийн ачааллыг бий болгосон байна. Энэ их мөнгө дарга нарынх нь машин, үнэтэй хаус болж байна" гэв.
Ардчилсан намын дэргэдэх Гэрэгэ бодлогын судалгааны хүрээлэнгийн Удирдах зөвлөл хуралдаж, гүйцэтгэх захирлын сонгон шалгаруулалтад хүсэлт ирүүлсэн нийт 13 нэр дэвшигчийн хүсэлтийг хэлэлцсэний үндсэн дээр Гүйцэтгэх захирлын албан тушаалд Х.Номингэрэлийг томилохоор шийдвэрлэсэн тухайгаа мэдээллээ.
