Улсын Их Хурлын даргын захирамжаар байгуулагдсан Гэр бүлийн хэрэг шүүхэд хянан шийдвэрлэх тухай хуулийн төслийг хэлэлцүүлэгт бэлтгэх үүрэг бүхий ажлын хэсгийн хуралд ХГБХХЕГ-ын төлөөлөл оролцож, санал, хүсэлтээ илэрхийллээ.

Гэрлэлт цуцлахад Хүүхдийн асран хамгаалагч тогтоох асуудлаар дүгнэлт гаргах “Шинжээчийн баг”-ийг Шүүх шинжилгээний тухай хуульд зааснаар Хүүхэд, гэр бүлийн хөгжил, хамгааллын газар, хэлтсийн албан хаагчийг томилон ажиллуулж байна. 2024 -2025 оны байдлаар аймаг, нийслэл дүүргийн хэмжээнд хүүхдийн асран хамгаалагч тогтоох асуудлаар холбогдох Шүүхээс 625 захирамж ирснээс 599 шинжээчийн баг, бүрэлдэхүүн тушаалаар томилон 1797 мэргэжилтэн, албан хаагчид ажилласан. ХГБХХЕГ-аас Гэр бүлийн хэрэг шүүхэд хянан шийдвэрлэх тухай хуулийн төсөл болон хамт өргөн мэдүүлсэн хуульд хүүхдийн өмчлөх эрх, шинжээчийн хүний нөөц, аюулгүй байдал, мэргэшсэн ТББ-уудыг шинжээчээр ажиллах нөхцөл бүрдүүлэх, гэрлэлт цуцалсан хэдий ч хүүхдийг эцэг, эхтэйгээ уулзах эрхээр нь хангах гэх мэт асуудлаар саналаа нэгтгэн уламжиллав.