Инновац, шинэ технологид суурилсан гарааны бизнес эрхэлж буй залуучуудыг дэмжих зорилготой “STARTUP 2026” улсын уралдаан зургаа дахь жилдээ зохион байгуулагдах гэж байна.

Тус уралдаан нь оролцогчдод бизнесийн санаагаа бодит төсөл болгон хөгжүүлэх, мэргэжлийн менторууд болон туршлагатай бизнес эрхлэгчдээс зөвлөгөө авах, цаашдын санхүүжилт, хөрөнгө оруулалтын боломжид холбогдох нөхцөлийг бүрдүүлдгээрээ онцлог юм.

“STARTUP 2026” улсын уралдааныг Хөдөлмөр, халамжийн үйлчилгээний ерөнхий газар болон JCI Монгол төрийн бус байгууллага хамтран зохион байгуулж байна.

Бүртгэл:
Уралдаанд оролцох хүсэлтэй залуучууд 2026 оны 4 дүгээр сарын 20-ны өдрөөс 5 дугаар сарын 4-ний өдрийг хүртэл бүртгүүлэх боломжтой.

Шагнал, Санхүүжилт:
Уралдаанд амжилттай оролцон, эхний байруудад шалгарсан нийт зургаан багт “Хөдөлмөр эрхлэлтийг дэмжих сан”-аас 50 хүртэлх хувийн эргэн төлөгдөх нөхцөлтэйгээр нийт 99 сая төгрөгийн санхүүжилт олгоно.

Үүнд:

• Тэргүүн байр – 1 багт 20 сая төгрөг
• Дэд байр – 2 баг тус бүр 17 сая төгрөг
• Гуравдугаар байр – 3 баг тус бүр 15 сая төгрөг

Мөн шилдэг гурван баг Ази, Номхон далайн бүсийн CYE олон улсын уралдаанд Монгол Улсаа төлөөлөн оролцох эрхтэй болох юм.

Старт ап арга хэмжээний онцлог, давуу талууд:

Инновац, технологид суурилсан гарааны бизнесийг дэмжих:

Оролцогчид өөрсдийн шинэлэг санаа, технологийн шийдлийг бодит бизнесийн загвар болгон хөгжүүлэх боломжтой. Инновацлаг бүтээгдэхүүн, үйлчилгээний өрсөлдөх чадварыг нэмэгдүүлэхэд чиглэсэн арга зүйн дэмжлэг үзүүлнэ.

Мэргэжлийн менторшип, зөвлөгөө авах боломж:

Салбартаа туршлагатай бизнес эрхлэгчид, зөвлөхүүд, мэргэжлийн менторуудтай хамтран ажиллаж, төслийнхөө сул болон давуу талыг тодорхойлон сайжруулах, стратеги төлөвлөлт хийх, зах зээлд нэвтрэх зөв чиглэлээ тодорхойлох боломж бүрдэнэ.

Бизнесийн сүлжээ, хамтын ажиллагааг өргөжүүлэх орчин:

Оролцогчид ижил зорилготой залуучууд, хөрөнгө оруулагчид, байгууллагуудтай танилцаж, урт хугацааны түншлэл, хамтын ажиллагааны суурийг тавих боломжтой. Энэ нь цаашдын бизнесийн өсөлтөд чухал нөлөө үзүүлнэ.

Хөрөнгө оруулалт, санхүүжилт татах боломж:

Шилдэг багууд санхүүгийн дэмжлэг авахаас гадна өөрсдийн төслийг хөрөнгө оруулагчдад танилцуулж, нэмэлт санхүүжилт татах, бизнесээ өргөжүүлэх боломж нээгдэнэ.

Улсын болон олон улсын түвшинд өөрийгөө таниулах боломж:

Амжилттай оролцогчид улсын хэмжээнд танигдахаас гадна олон улсын тэмцээн, арга хэмжээнд оролцох эрх авч, өөрсдийн бизнесийг гадаад зах зээлд таниулах, туршлага солилцох боломжтой.

Дэлгэрэнгүй мэдээлэл авах:

Сонирхсон иргэд тус уралдааны цахим хуудсаар зочлон бүртгэлийн заавар, шаардлага, үе шатны мэдээлэлтэй танилцах боломжтой. Мөн 9903-8711 дугаарын утсаар холбогдон нэмэлт мэдээлэл, зөвлөгөө авахад нээлттэй.