Оросын Ерөнхийлөгч Владимир Путин Холбооны хамгаалалтын албаны төв аппаратыг дахин өргөжүүлэх тухай зарлигт гарын үсэг зуржээ. Энэ нь Украинд бүрэн хэмжээний дайн эхэлснээс хойшхи дөрөв дэх удаа болж байна.

Тус баримт бичигт дурдсанаар, Холбооны хамгаалалтын албаны төв аппаратын бие бүрэлдэхүүний дээд тоог 785-аас 812 болгон нэмэгдүүлсэн байна. Өмнөх нэмэгдлийг 2025 оны 1-р сарын 1-нд (785 хүн) баталсан бөгөөд өмнө нь уг орон тоог 2024 оны 1-р сарын 1-нд (775), 2022 оны сүүлээр (725-аас 760) өргөжүүлж байв. Дайны өмнө Холбооны хамгаалалтын албаны төв аппаратыг бараг 13 жилийн турш өргөжүүлээгүй байв.

Холбооны хамгаалалтын алба нь тус улсын гол чухал хүмүүс болох ерөнхийлөгч, ерөнхий сайд, парламентын танхимын дарга нар, дээд шатны шүүхийн дарга нар, ерөнхий прокурор зэрэг албан тушаалтнуудын аюулгүй байдлыг хариуцдаг хаалттай аюулгүй байдлын бүтэц юм. Түүний бүтцэд Владимир Путины хамгаалалтын алба багтдаг бөгөөд тэрээр түүнийг аяллыг дагалдан, орон сууц, байгууламж зэргийг хамгаалдаг.

Үүнээс гадна, Холбооны хамгаалалтын алба нь тусгай харилцаа холбоо, олон нийтийн санал бодлыг хянах чиглэлээр ажилладаг бөгөөд дайн эхэлсний дараа тус албаны үүрэг мэдэгдэхүйц нэмэгдэж, «Важных историй” хэвлэлийн мэдээлснээр Путинд байнга ханддаг өндөр албан тушаалтнуудын талаарх мэдээлэлтэй болсноор бие даасан нөлөөллийн төв болсон байна.

Financial Times сонины нэрээ хэлээгүй эх сурвалжуудын мэдээлснээр, сүүлийн саруудад Холбооны хамгаалалтын алба Путины эргэн тойрон дахь аюулгүй байдлын арга хэмжээг огцом чангатгасан байна. Кремльд Путиныг нисгэгчгүй онгоц ашиглан алах оролдлого, эсвэл төрийн эргэлт хийх оролдлогын нэг хэсэг болгон алах оролдлогын бай болж магадгүй гэсэн болгоомжлол нэмэгдэж байна. FT эх сурвалжуудын мэдээлснээр, Венесуэлийн Ерөнхийлөгч Николас Мадурог АНУ-ын цэргийнхэн баривчилсны дараа эдгээр айдас улам бүр нэмэгдсэн бөгөөд үүний үр дүнд Путин айлчлалынхаа тоог цөөрүүлж, түүнтэй уулзаж буй хүмүүсийг илүү хатуу шалгах болсон байна.

Тавдугаар сарын сүүлээр Казахстанд хийсэн албан ёсны айлчлалын үеэр түүний машины цувааг дээвэр дээрээ пулемёт суурилуулсан хуягт машин, цахим дайны системээр тоноглогдсон тээврийн хэрэгсэл, нисдэг тэрэг дагалдан явжээ.

FT-ийн мэдээлснээр, Путин болон түүний гэр бүлийн хүмүүс Москва, Валдай дахь байрандаа бараг зочлохоо больж, Краснодарын хязгаар зэрэг бункерт хэдэн долоо хоног байхыг илүүд үзэж байгаа аж.

Ж.Батдорж

Эх сурвалж: The Moscow Times