ОХУ-ын Москва хотын Мөргөлийн уулын Ялалтын цэцэрлэгт хүрээлэнд байгуулагдах Бурханы сүмийн шав тавих ёслол болжээ. 

Хоёр орны баатарлаг цэргүүдийн дурсгалд зориулж буй энэ сүмийг Их ялалтын 70 жилийн ойн өдрөөс урьтаж ашиглалтад оруулахаар яаравчилж байгаа аж. Шав тавих ёслолд оролцсон Монгол Улсаас ОХУ-д суугаа Онц бөгөөд Бүрэн эрхт Элчин сайд Ш.Алтангэрэл оролцсон бөгөөд "ЗХУ-ын Эх орны их дайны анхны тулалдаан 1939 онд Халх гол дээр болсон гэж ярьдаг. Тэгвэл сүүлчийнх нь 1945 онд Хянганы нурууг давж Манжуурыг чөлөөлөхөд болсон гэж хэлж болно. Монгол цэргүүд эдгээр хоёр тулаанд хоёуланд нь оролцсон. Мөн монголын ард түмэн дайны жилүүдэд эдийн засгийнхаа бүхий л боломжийг дайчлан хөрш улсаа дэмжиж ирсэн. Монгол Улс бурханы шашинтай орон. Дайны баатарлаг дурсгалд зориулж буй эдгээр сүм нь манай хоёр ард түмний баатарлаг нөхөрлөлийн дурсгал болно гэдэгт итгэлтэй байна” хэмээжээ. 

Бурханы шашны сүмийн шав тавих  ёслолын ажиллагаанд ОХУ-ын Холбооны Зөвлөл, Төрийн Дум, Ерөнхийлөгчийн тамгын газар, Москва хотын Засгийн газрын гишүүд болон Тува, Буриад, Халимагийн шашны тэргүүнүүд, Өвөр Байгалын хязгаар, Эрхүү мужийн  бүрэн эрхт төлөөлөгчид оролцсон байна. Түүнчлэн Монгол Улсаас ОХУ-д суугаа Онц бөгөөд Бүрэн эрхт Элчин сайд Ш.Алтангэрэл тэргүүтэй элчин сайдын яамны хамт олон, "УБТЗ", "Эрдэнэт үйлдвэр", "Монросцветмет" зэрэг компаниудийн төлөөлөгчийн газар, Москва дахь монголчуудын "Мөнх тэнгэрийн дор" нутгийн зөвлөл, оюутан, сонсогчдын төлөөлөл оролцжээ.