Гэр бүл нийгэмд болон хувь хүнд маш олон үүрэг гүйцэтгэдэг. Нэгэнт гэр бүл болохоор шийдсэн бол үүргээ болоод хариуцлагаа сайтар ухамсарласан байвал зохилтой.  Гэр бүл нийгмийн өмнө хүлээсэн үүргээ хэр зэрэг биелүүлэхээс тухайн нийгмийн хөгжлийн ирээдүйн төлөв байдал ихээхэн шалтгаална. Гэр бүл нийгмийн институт болохын хувьд материаллаг баялгийг үйлдвэрлэх хуваарилахад оролцож байдаг.    Гэр бүлийн хөдөлмөрийн чадвартай гишүүд хөдөлмөрийн чадваргүй болон насанд хүрээгүй хүмүүсээ тэтгэн тэжээж гэр бүлийн эдийн засгийн үүргийг гүйцэтгэдэг. Энэхүү үүргээ амжилттай биелүүлэхийн тулд хүн нийгмийн үйлдвэрлэлд идэвхитэй оролцож боловсрол мэргэжлээ дээшлүүлэн, овсгоо самбаатай байж материаллаг нөхцөл байдлаа дээшлүүлэх боломжтой болно. Үүнтэй аж ахуйн үүрэг нягт холбоотой юм. Идэх хоол, өмсөх хувцас, орох орон байрны асуудал гэр бүлийн гол асуудал ба түрээсийн байранд комиссын хувцас өмсөөд юу тааралдсанаа идэх үү? Орчин үеийн тохилог өөрийн байранд, чанартай эдэлгээтэй өөрийн хувцсаа өмсөөд, эрүүл аюулгүй хүнсээр хооллох уу? гэдгийг амьдрах ухааны их сургуулийн боловсрол бидэнд зааж өгдөг болохоос их дээд сургууль бүхэн бидэнд бүрэн зааж өгдөггүй.

Гэр бүлийн хамгийн гол үүрэг бол нөхөн үржихүйн үүрэг. Өнөөдөр Монголд гэр бүл дунджаар 4-5 гишүүнтэй. Хүн амыг нөхөн үйлдвэрлэхээс гадна хүүхэд төрүүлж хувь хүний хэрэгцээгээ хангаад зогсохгүй мөн хүнийг оюун санаа, ёс суртахууны хувьд нөхөн үйлдвэрлэх, хүүхэд эцэг эхтэйгээ оюун санаа, сэтгэл зүйн нэгдэлтэй байхыг төлөвшүүлдэг.

Гэр бүл нийгмийн анхдагч хянагчийн үүрэг гүйцэтгэхдээ гэр бүлийн гишүүдийн нийгэмд биеэ авч явах ёс суртахууны хэм хэмжээг тогтоохоос гадна эцэг эхийн, эцэг эх хүүхдийн, ахмад болон өсвөр үетэйгээ харьцах харилцааны соёл, хариуцлага эрх үүргийн хэм хэмжээг тогтоож хянаж байдаг.

Гэр бүлийн хүмүүжүүлэх үүрэг өсвөр болон залуу үеийг нийгэмшүүлэх, бие хүн болгох, хүүхдүүдийг эрүүл чийрэг бие бялдартай, эх оронч, зөв боловсон ёс суртахууны үлэмж соёлтой иргэн болгож хүмүүжүүлэх шаардлагыг тавьдаг.

Энэхүү үүрэгтэй гэр бүлийн гишүүдийн оюун санааны нэгдэлтэй байх үүрэг нягт холбоотой. Гэр бүлийн гишүүдийнхээ оюун санааны хөгжлийг дэмжиж, эв нэгдэлтэй байж, нэг нэгнийхээ өмнө ёс суртахууны хэм хэмжээг чанд баримталж байх шаардлагатай юм.

Нийгэм-нэр хүндийн үүрэг нь  гэр бүлийн гишүүдэд нэр хүнд, мэдлэг боловсрол, өв хөрөнгөө өвлүүлж нийгэмд эзлэх байр суурийг дээшлүүлэхэд нөлөөлдөг.

Гэр бүл чөлөөт цагаа зөв өнгөрөөх үүрэг нь гэр бүлийн гишүүд чөлөөт цагаараа сурч боловсрох авъяас чадвараа нээж хөгжүүлэхэд бололцоогоор хангаж, үзэл бодлоо илэрхийлэх, хамтарч чөлөөт цагаа зүй зохистой өнгөрөөхийг дэмжих явдал юм.

Гэр бүлийн сэтгэл санааны үзүүлэх нөлөө нь гэр бүлийн гишүүд зөвхөн идэж уух, өмсөж зүүх хэрэгцээгээ хангаад зогсохгүй нэг нэгэндээ оюун санаа, сэтгэлзүйн дэмжлэг үзүүлэх, сэтгэлийн хөдөлгөөнийг тогтворжуулах, хувь хүний баяр баяслын хэрэгцээг гэр бүл хангаж байх үүрэг юм.

Гэр бүлийн бэлгийн харилцааны үүрэггүйгээр нөхөн үржихүйн үүрэг хэрэгжихгүй. Энэхүү үүрэг нь гэрлэгсдийн бие физиологийн бэлгийн хэрэгцээг хангаж, хяналт тавих байдлаар илэрч байдаг.