Ашиглалтын шаардлага хангахгүй болсон нийтийн зориулалттай Баянгол дүүргийн 39 орон сууцыг дахин төлөвлөхөөр болж, энэхүү ажлыг зохион байгуулахыг нийслэлийн Ерөнхий төлөвлөгөөний газарт даалгасан. Уг ажлын хүрээнд Ерөнхий төлөвлөгөөний газраас Баянгол дүүргийн I хорооны 10, 11, 12, 13, 14, 15, 16, 17, 18, 20 дугаар байр, II хорооны 1, 2, 3, 5, 6, 7 дугаар байр, III хорооны 21, 22, 23, 24, 35, 36, 37 дугаар байр, 4 дүгээр хорооны 1, 2, 3, 4, 5, 6, 7, 8, 9 дүгээр байр, 20 дугаар хорооны нутаг дэвсгэрт байрлах БХН-30, БХН-1-27, БХН-2-27, ТТЭ-37, БХН-48, ОС-8, АТ-12 дугаар орон сууцны барилгыг дахин төлөвлөн барилгажуулах төсөл боловсруулж, барилгажилтын ажил гүйцэтгэх эрх бүхий аж ахуйн нэгж, байгууллагуудын дунд сонгон шалгаруулалт зарлалаа.
Төсөл хэрэгжүүлэгчийн сонгон шалгаруулалтын баримт бичгийг худалдан авч танилцсан аж ахуйн нэгж, байгууллага төсөл хэрэгжүүлэх саналаа битүүмжилсэн байдлаар эх хувь, хуулбар хувь, цахим хувийг бэлтгэн 2015 оны 3 дугаар сарын 16-ны өдрөөс өмнө нийслэлийн Ерөнхий төлөвлөгөөний газарт ирүүлэх юм байна. Харин төсөл хэрэгжүүлэгчид дараахь материалыг бүрдүүлнэ. Үүнд:

• Аж ахуйн нэгж, байгууллагын гэрчилгээ, тусгай зөвшөөрлийн хуулбар, ерөнхий танилцуулга
•  Сүүлийн 3 жилийн санхүүгийн тайлан, аудитын дүгнэлт
•  Татвар болон шүүхийн байгууллагаас авсан тодорхойлолт
•  Түншлэлийн гэрээ / 2 ба түүнээс дээш аж ахуйн нэгж нэгдэж консорциум хэлбэрээр төсөл хэрэгжүүлэх саналтай бол заавал ирүүлнэ /
•  Барилгажилтын төсөл / эскиз, гадна шугам сүлжээний шийдэл /
•  Төсөл хэрэгжүүлэх аргачлал, төлөвлөгөө, сараар гаргасан график
• Оршин суугчдын төсөл хэрэгжүүлэх явцад түр суурьшуулах төлөвлөгөө
•  Зураг төслийн болон барилга угсралтын ажлын туршлага, сүүлийн 3 жилд хийж гүйцэтгэсэн барилга, хөрөнгө оруулалтын мэдээлэл
•  Санхүүгийн эх үүсвэр / төсөлд шаардагдах нийт хөрөнгө оруулалтын эх үүсвэрийг нотолсон дансны хуулга, зээлжих эрх, банкны баталгаа /
•  Төслийг хэрэгжүүлэх техникийн чадавхийн мэдээлэл / өөрийн эзэмшлийн тоног төхөөрөмж, машин механизм, хүний нөөцийн мэдээлэл, удирдлагын багын танилцуулга /