Их Монгол Улсын тав дахь хаан Хубилайн мэндэлсний 800 жилийн ойд зориулан гаргасан мөнгөн зоосны нээлтийн үйл ажиллагаа "Арт Хаус" төвд өнөөдөр боллоо. Энэхүү зоос нь Хубилай хааны өнгөт дүр бүхий 925 сорьцтой, 25 граммын цул мөнгөн зоос бөгөөд нийт 2500 ширхэгийг гаргаж байгаа аж. Монгол Улсын түүхэн дэх Юань улсыг байгуулсан их хааны хөрөг бүхий уг зоосыг арван мянган төгрөгийн нэрлэсэн үнэтэйгээр гаргасан байна. Нэрлэсэн үнэ гэдэг худалдаалах үнэ биш бөгөөд зоосны үнэ цэнийг илэрхийлсэн утгатай аж. Харин худалдаанд 125 мянган төгрөгөөр зарагдаж байна.