Монгол хэлний тухай хуулийн 21 дүгээр зүйлд заасны дагуу Монгол Улсын Ерөнхийлөгчийн дэргэд ажилладаг Хэлний бодлогын үндэсний зөвлөл “Монгол хэлний зөв бичих дүрмийн журамласан толь” номыг хоёр жилийн хугацаанд бүтээж дуусчээ. Хамгийн сүүлийн хувилбар болох энэ толинд бичигдсэнээр цаашид зөв бичгийн дүрмийг баримтлах аж.

“Монгол хэлний зөв бичих дүрмийн толь” номыг бүтээхэд нийт 20 гаруй эрдэмтнээс бүрдэх ажлын хэсэг ажиллаж, хэл шинжлэлийн академич, шинжлэх ухааны докторууд хувь нэмрээ оруулжээ. Монгол Улс нь 1983 оноос хойш Ц.Дамдинсүрэн, Б.Осор нарын “Монгол үсгийн дүрмийн толь”, 18 мянган үгтэй толь бичгийг хэрэглэж хэвшсэн билээ.

Хэлний бодлогын үндэсний зөвлөлөөс гарч буй “Монгол хэлний зөв бичих дүрмийн журамласан толь” номд 37486 үг орсон бөгөөд 6000 орчим гадаад үгээс шигшиж, 1000 гадаад үг оруулжээ. Энэ номыг Монгол хэлний тухай хуульд зааснаар хэвлэх шийдвэр энэ тавдугаар сард гарсан. Номыг монгол хэл, уран зохиолын хичээл заадаг 9600 гаруй багш болон төрийн албан хаагчдад үнэгүй тарааж өгөх юм байна.