Үхрийн махны үнэ өнгөрсөн долоо хоногтой харьцуулахад 53-298 төгрөгөөр буурсан бол хонины мах 44-412 төгрөгөөр өссөн байна. Гурил, талх болон хүнсний ногооны үнэ тогтвортой байгааг Нийслэлийн Статистикийн хорооноос долоо хоног бүр ГАРГАДАГ өргөн хэрэглээний бараа, бүтээгдэхүүний үнийн судалгаанд заажээ.  

2020 оны хоёрдугаар сарын II долоо хоногоор мах, гурил, хүнсний ногооны үнийг авч үзвэл

Мах:

• Хонины ястай мах нэг килограмм нь дунджаар 9633 төгрөг
• Үхрийн ястай мах нэг килограмм нь дунджаар 11399 төгрөгийн үнэтэй байна.

Өмнөх долоо хоногтой үхрийн ястай махны үнэ харьцуулахад 53 төгрөгөөр (0.5%), үхрийн цул махны үнэ 239 төгрөгөөр (1.8%)  буурсан  үзүүлэлт байна.

Үхрийн ястай махны үнэ энэ долоо хоногт: “Хүчит шонхор” хүнсний зах дээр хамгийн хямд буюу 10000 төгрөг,  “Меркури” хүнсний захаар хамгийн өндөр үнэтэй буюу 14000 төгрөгөөр тус тус худалдаалагдаж байна. 

Харин хонины ястай мах бусад захуудыг бодвол энэ долоо хоногт “Хүчит шонхор” хүнсний зах дээр хамгийн хямд буюу 8300 төгрөгөөр худалдаалагдаж байгаа бол “Меркури” хүнсний захаар хамгийн өндөр үнэтэй буюу 13000 төгрөгөөр худалдаалагдаж байна. 

Хонины махны үнийг өмнөх долоо хоногтой харьцуулахад: Ястай хонины мах 44 төгрөгөөр (0.5%), хонины цул мах 412 төгрөгөөр (4.5%) тус тус өссөн байна.

Гурил: 

• “Алтан тариа” савласан нэг кг гурилын үнэ дээд зэрэг нь 1419-2000 төгрөг
• 1-р зэргийнх 1179-1500 төгрөг
• 2-р зэргийнх 800-1100 төгрөг байна.

Худалдан авагч олон байдаг “Хүчит шонхор”, “Таван эрдэнэ”, “Бөмбөгөр”, “Баянзүрх”, “Хархорин” хүнсний захуудад задгайгаар буюу шуудайгаар худалдаж буй нэг кг дээд зэргийн “Алтан тариа” гурилын үнэ 1390-1500 төгрөгийн үнэ ханштай байна.

Харин “Хүчит шонхор”, “Баянзүрх”, “Барс” хүнсний захуудад:

• дээд зэргийн “Алтан тариа” гурил 1400 төгрөг
• 1-р зэргийн гурил 1200 төгрөгөөр тус тус зарагдаж байна.

“Атар” талх хүнсний зах, дэлгүүрт 1200-1399 төгрөгийн үнэтэй байна. “Хүчит Шонхор”, “Хархорин”  хүнсний захуудад “Атар” талхыг хамгийн хямд буюу 1200 төгрөгөөр, харин “Номин” супермаркетад хамгийн өндөр үнээр буюу 1399 төгрөгөөр худалдаалж байна.

Хүнсний ногоо:

Хүнсний ногооны үнийг өмнөх долоо хоногтой харьцуулахад монгол төмс 1.0 хувиар буурч 814 төгрөг, байцай 0.5 хувиар өсч 1684 төгрөгөөр тус тус худалдаалагдаж байна. Харин бусад хүнсний ногооны үнэ тогтвортой байлаа.