Мэргэжлийн хяналтын байгууллагаас байгаль орчин, газар, геодези, геологи, уул уурхайн хяналтын чиглэлээр “Зөв дадал – Ногоон ирээдүй” цахим аяныг энэ оны тавдугаар сарын 01-нээс 31-ний хооронд улсын хэмжээнд амжилттай зохион байгуулж дуусчээ. 

Уг аян нь цаг үеийн нөхцөл байдалтай уялдуулан цахим орчинд зохиогдсон бол Төв, орон нутгийн мэргэжлийн хяналтын газруудаас нарийвчилсан төлөвлөгөө гаргаж, улсын хэмжээнд 16 чиглэлийн 268 ажлыг төлөвлөж хэрэгжүүлжээ.

Орон нутагт “Цэвэр хот-цэвэр сум”, “Хоггүй цэвэр хот”, “Хогоо цэвэрлэе” зэрэг аяныг зохион байгуулж гудамж талбай, албан газар, айл өрхийн хэмжээнд хог хаягдлыг ангилан ялгаж хэвшүүлэх, дөрвөн аймгийн 42 суманд хог хаягдлыг ангилан ялгах хогийн савнуудыг байршуулсан бол 680 аж ахуйн нэгж, байгууллага, албан хаагч, ажилчдыг уриалан нийтийн эзэмшлийн 567.5 га газар, зам, талбайд хаягдсан 6850 тн ил задгай хог хаягдлыг хамтран цэвэрлэсэн байна.

 Улсын хэмжээнд 410 аж ахуйн нэгж, байгууллага, айл өрх, 7965 иргэнийг хамруулан 137476 ширхэг модыг нийтийн эзэмшлийн зам талбай, айл өрхийн хашаанд бүх нийтээр мод тарих аяныг өрнүүлж тарижээ.

Уул уурхайн олборлолтоос эвдэгдсэн газрыг нөхөн сэргээх талбайн хэмжээг нэмэгдүүлэх уриалгыг гаргаж, уул уурхай бүхий аймгуудийг уриалгад нэгтгэннийт 187.7  га талбайд техникийн нөхөн сэргээлт, 112.1 га биологийн нөхөн сэргээлтийг хийлгэсэн аж. 

“Зөв дадал - Ногоон ирээдүй” цахим сарын аянаар улсын хэмжээнд аймаг, нийслэл, сум, дүүргийн байгаль орчин, геологи уул уурхайн хяналтын улсын байцаагчид, Тусгай хамгаалалттай газар нутгийн хамгаалалтын захиргаадын мэргэжилтэн, байгаль орчны байцаагч, байгаль хамгаалагчид, хуулиар тусгайлан эрх олгогдсон байгаль хамгаалагч зэрэг нийт 741 албан хаагчид хариуцсан нутаг дэвсгэрийн хэмжээнд зохион байгуулж, Байгаль орчныг хамгаалах багц хууль тогтоомжийг сурталчлах зорилгоор ой хээрийн түймэр, хууль бус мод бэлтгэл, уул уурхайн нөхөн сэргээлт, газар ашиглалт, агаарын бохирдол, хог хаягдал, ус, хөрс, химийн бодисын ашиглалт, хамгаалалтын чиглэлээр видео хичээл, зөвлөмж, зурагт хуудас бэлтгэн байршуулжээ.