Арц нь нян устгах, агаар цэвэршүүлэх өндөр үйлчилгээтэй тул амьсгалын замын өвчнөөс урьдчилан сэргийлдэг ач тустай. Арц нь 1-3 метр өндөртэй мөнх ногоон бутлаг ургамал юм. Манай орны ойт хээр, шинэс, хушин ой, наранги хад, асгатай ууланд дөрвөн зүйл арц ургадаг. Тэдгээрийг хонин арц, Дагуур арц, ямаан арц, хуурамч арц хэмээн нэрлэдэг. Хонин арцны шилмүүс нарийхан, хайрслаг сүлжмэл ширхэгтэй, ямаан арцны шилмүүс зүү шиг үзүүртэй, гар хадуур мэт махир бөгөөд тод цагаан судалтай байдаг.