Том Хенксийн хачирхалтай бичгийн машины цуглуулга

түрүүлж мэдээлнэ

Архив

2014.06.22 03:27

836

Том Хенксийн хачирхалтай бичгийн машины цуглуулга

АНУ-ын алдарт жүжигчин, зохиолч, продюсер, найруулагч Том Хенксийн хачирхалтай хобби “Бичгийн машин цуглуулах” билээ. Магадгүй энэ нь зохиолч хүмүүсийн хобби бөгөөд АНУ-ын алдарт зохиолч Дон Делилло өөрийн “Libra”, “White Noise” зохиолуудаа бичгийн машинаар бичсэн гэгддэг. Мөн тэрбээр 2001 он хүртэл бичгийн машинаар зохиолоо бичдэг байсан аж.

Жүжигчин Том Хенкс анхныхаа бичгийн машиныг 1978 онд худалдаж авснаар түүний сонирхол эхэлжээ. Тэр ч мөн Дон Делило шиг урт удаан хугацаанд бичгийн машинаар зохиол бичдэг байсан гэнэ. Түүнд 100 өөр төрлийн 200 гаруй бичгийн машин байдаг. Мэдээж тэдэн дунд дэлхий дээр маш ховор болсон бичгийн машинууд ч байдаг байна. Том Хенкс хүмүүст баярласнаа илэрхийлэх, захиа бичих зэрэг жижиг сажиг зүйлд машинаа хэрэглэж харин ажлаа энгийн компьютероороо хийдэг аж.

Түүний цуглуулгад байдаг 1900 оны "Yost" бичгийн машин

Түүнд бичгийн машин цуглуулах ямар нэгэн онцгой шалтгаан байхгүй бөгөөд тэрбээр энэ талаар сонирхсон хүмүүст “Би тэдний үсэг цохих болгонд дуугарах, бүх машинууд өөр өөр дуутай, бэхний үнэр ханхалдаг зэрэгт нь дуртай” хэмээн ярьж байжээ. Мөн бичгийн машин нь засах боломж муутай учраас санаандаа орж ирсэн гайхалтай санааг шууд буулгаж авахаас гадна и-мэйл, олон нийтийн сүлжээ, вэб хуудсууд харагдахгүй тул төвлөрөхөд сайн орчинг бий болгодог байна.

Нэг удаа Том Хенкс өөрт нь захидал бичсэн эмэгтэйн ач хүүгийнх нь сургуулийн төлбөрт туслахын тулд түүний 50 ам.долларын бичгийн машиныг нь 500 ам.доллараар худалдан авчээ. Гэхдээ бичгийн машин бүгд тийм ч хямдхан биш бөгөөд тэрбээр 20-150 ам.доллараар худалдан авдаг байсан гэнэ.

Том Хенкс бичгийн машины үүх түүхийг өгүүлэх бөгөөд 1960, 1970 оноос бичгийн машин хуванцар, цайвар өнгөтэй болж хийц загвар нь сайжирсан хэмээн ярьж байжээ. Мөн тэрбээр өөрийн бичгийн машинуудаасаа зорчиж байгаа зарим газарт авч явдаг аж.