Дэлхийн эрүүл мэндийн байгууллага хүүхдийг осол гэмтэл, хүчирхийллийн эрсдлээс урьдчилан сэргийлж чадвал өдөрт 2000 гаруй хүүхдийн амь нас, эрүүл мэндийг аврах боломжтойг мэдээлсэн байна. Судалгаагаар хүүхдийн осол гэмтлийн 90 гаруй хувийг асран хамгаалагч, эцэг эхийн хайхрамжгүй байдлаас үүдэлтэй ба хүүхдийн осол гэмтлийн улмаас нас барах тохиолдол хөгжил буурай болон хөгжиж байгаа оронд 3,4 дахин их байна.

2012 оны эрүүл мэндийн үзүүлэлтээр осол гэмтлийн өвчлөлийн тохиолдлын 27.9 хувь нь 19 хүртэлх насны хүүхдүүд ба бүртгэгдсэн осол гэмтлийн тохиолдлын тэргүүлэх шалтгаанд бүх төрлийн уналтаас үүдэлтэй осол гэмтэл 10000 хүүхдэд 321.2, зам тээврийн осол гэмтэл 42.9, 0-5 хүртэлх насны хүүхдийн түлэгдэлт 154.4 байсан аж. Харин энэ  оны эхний дөрөвдүгээр сарын байдлаар эцэг, эх, асран хамгаалагчийн хүүхдэд тавих анхаарал, халамж сул, хариуцлагагүй байдал, хүүхдийг хормын төдий эзэнгүй орхисноос хүүхэд халуун цайнд түлэгдэх, савтай усанд унах, гадаа жорлонд ойчих, мөн хөхөөр дарж бүтээх, зодож гэмтээх зэрэг шалтгааны улмаас тав хүртэлх насны 29 хүүхэд нас баржээ.