УИХ-ын гишүүн С.Ганбаатар нүүрсний хулгайтай холбоотой асуудлаар мэдээлэл хийлээ. 

С.Ганбаатар: Өнөөдөр "Биржийн тухай хууль" орж ирсэн. Үүнийг эцэслэн батлахтай холбогдуулаад тогтоолын төсөл орж ирсэн. Гуя дагаж хүзүү гэдэг шиг Монголын нүүрсний хулгайчид ЭТТ-г тэр чигт хувьчилж авах санаархал орж ирснийг энэ тогтоолтой холбогдуулж би эсэргүүцсэн. Өнгөрсөн Эдийн засгийн байнгын хороон дээр яригдаад дэмжигдсэн боловч ирэх долоо хоногт бас яригдаж байна. Үүнийг бүгд анхааралдаа авах хэрэгтэй байна.

ЭТТ компанийн хувьцааг нийтэд санал болгохыг зөвшөөрсөн тухай тогтоолын төсөл орж ирж байгааг эсэргүүцэж би мэдээлэл хийлээ. Одоо эрх баригчид энэ асуудлыг засна, ирэх долоо хоногт үүнийг дахин эдийн засгийн байнгын хороогоор хэлэлцэнэ, засна гэж  УИХ-ын Чуулганы үеэр сая ярилаа. 

Эрдэнэс Таван толгой компанийн хувьцаа угаасаа ард түмний өмч байхад яагаад нийтэд санал болгох гээд байгаа юм бэ? Гадаадын болон дотоодын олигархуудад үүнийг өгч болохгүй.

Эрдэнэтийн 49 хувийг хувьчлах гэж оролдсоноос болж Ч.Сайханбилэгийн ЗГ бөөрөө гаргуулсан. Өнөөдөр энэ Эрдэнэс Тавантолгойд хулгай гарчлаа, ил тод болгоё гээд хувьчилж болохгүй. Харин МАН-аас гүйцэтгэх захирлыг нь тавиад, хэдэн зуун сая долларын хулгай хийгээд тэрийгээ тавьсан эздэдээ тарааж өгсөн асуудлаа ил болгож, менежмент, гэрээнүүдийг ил болгох ёстой!