“Үнэгүй хоол зөвхөн хулганы хавханд байдаг” гэдэг үгийн үнэ цэнийг Монголчууд бид хэзээ ухамсарлах вэ? Ажил хийлгүй амар хялбар аргаар мөнгөтэй болох гэсэн хэсэг бүлэг хүмүүсийн итгэл сэтгэл дээр залилан мэхлэгчид “чихэр дээр суух ялаа шиг” оволзож, койн, виртуаль валют, сүлжээний бизнес, хонжворт сугалаа гэх зэрэг аргаар дамжуулан мөнгөө амархан өсгөж, баян болох боломж байна хэмээн “чихэн дээр нь цэцэг” ургуулж, мөнгө хөрөнгийг нь залилдаг.

 

Ийм төрлийн залилагчдын шалгарсан арга нь эхний хүмүүст мэдэгдэхүйц ашиг, хувь олгож эхэлдэг. Дараа нь өнөөх түр зуурын “ашиг ологчид”-оороо дамжуулан бусдыг сүлжээндээ нэгтгэх ажлыг даллан дууддаг. Манайхны ихэнх нь амар хялбар аргаар хөрөнгөжих гэсэн шунаг сэтгэлдээ автаж эрүүл, энгийн логикт итгэхээс илүүтэй бусдын аман сэнхрүүлэг, амнаас ам дамжин яригдах “нөгөө хэн тэнд элсээд, койн аваад тэгж баяжиж гэнэ” гэсэн ярианд үнэнээсээ итгэж, орон байр, унаа машинаа барьцаалан, тавьсан мөнгөөрөө койн, виртуаль валют худалдан авч, сүлжээнд элсч, сугалаанд оролцож мөнгөө тавиад туучихдаг. Дараа нь залилуулсныаа мэдсэн ч нэгэнт хожимдсон байдаг.

 

Мөнөөх залилагчид хэзээ таны болон бусдын мөнгийг үрчихсэн, гадаад дотоодод зугаалчихсан, хөдлөх болон үл хөдлөх хөрөнгө худалдаад авчихсан байдаг. Үнэн байдал ийм атал өнөөдрийг хүртэл амар хялбар аргаар мөнгөтэй болохыг хүсэгчид Койн, сүлжээний хохирогчид болсоор л.

Тиймээс хууль шүүхийн байгууллага энэ асуудалд анхаарлаа хандуулж залилан мэхлэгчдийн золиос болсон иргэдийг хамгаалах хууль зүйн орчныг бий болгох, залилагчдын хууль бусаар олсон орлого, хөрөнгийг нь битүүмжилж, дуудлага худалдаагаар оруулж худалдан хохирогчдын хохирлыг барагдуулах, дахин энэ төрлийн гэмт хэрэг гарахаас урьдчилан сэргийлэх, ухаж ойлгуулах ажлыг түргэн шуурхай хийж ажиллах ёстой! Эс тэгвээс нийтээрээ, нийгмээрээ зүгээр сууж байгаад баяжих сэтгэлгээтэй болж, хохирогчдын тоо өдөр ирэх тусам нэмэгдэж байна!