Монгол Улсын Ерөнхийлөгч У.Хүрэлсүх, гэргий Л.Болорцэцэг нарын урилгаар Бүгд Найрамдах Польш Улсын Ерөнхийлөгч Анджей Дуда гэргий Агата Корнхаузер-Дудагийн хамт Монгол Улсад 2023 оны 04 дүгээр сарын 24-26-ны өдрүүдэд төрийн айлчлал хийх гэж байна.

Монгол Улс, БНПУ 1950 оны 04 дүгээр сарын 14-нд дипломат харилцаа тогтоосон. Найрсаг харилцаа, хамтын ажиллагааны хүрээнд 1990 оноос өмнө БНПУ-ын зээл, тусламжаар хийгдсэн бүтээн байгуулалтын талаар сонирхуулбал:

1. Дарханы царууц тоосго, шохойн үйлдвэр /1966 он/
2. Улаанбаатарын Хөнгөн бетоны үйлдвэр /1966 он/
3. Хархорины дулааны цахилгаан станц /1970 он/
4. Улаанбаатарын мод боловсруулах комбинат /1971 он/
5. Улаанбаатарын спиртийн үйлдвэр /1974 он/
6. Хархорины спиртийн үйлдвэр /1974 он/
7. Улаанбаатарын Халиман цавууны цех /1975 он/
8. Чойбалсангийн царууц тоосгоны үйлдвэр /1985 он/
9. Улаанбаатарын Нэхээсгүй эдлэлийн үйлдвэр /1989 он/

Харин 2022 оны байдлаар Монгол Улс, БНПУ-ын худалдааны эргэлт 98,3 сая ам доллар байна.

 “Монгол Улсын Засгийн газар, Бүгд Найрамдах Польш Улсын Засгийн газар хоорондын нөхцөлт зээлийн хэлэлцээр”-т (50сая евро) 2017 оны 05 дугаар сарын 09-ний өдөр гарын үсэг зурсан юм. Зээлийн хугацаа 33 жил, зээлийн хүү 0,15 хувь. Нөхцөлт зээлийн Ерөнхий хэлэлцээрийн хугацааг 2021 онд дахин сунгаад байна.

Зээлийн хөрөнгөөр аймгуудын бохир ус цэвэрлэх байгууламжийг өргөтгөн  шинэчлэх, шинээр барих, гал түймэртэй тэмцэх техник, тоног төхөөрөмжийг шинэчлэх, гамшиг, ослын үед үүрэг гүйцэтгэх хээрийн хөдөлгөөнт II шатлалын эмнэлэг барих, Эрдэнэт хотын хатуу хог боловсруулах үйлдвэр байгуулах, хог хаягдлыг татан зайлуулах менежментийг сайжруулах, орон нутагт явуулын эмнэлгийн тусламж, үйлчилгээ үзүүлэх тусгай тоноглогдсон автомашин ханган нийлүүлэх зэрэг төсөл, хөтөлбөр хэрэгжүүлжээ.