Тулгар төрийн 2223, Их Монгол Улсын 808, Ардын хувьсгалын 93 жилийн ой, Үндэсний их баяр наадмын хүчит бөхийн барилдаанд энэ жил 512 бөх уран мэхийг уралдуулан барилдсанаас  Увс аймгийн Ховд сумын харьяат удамт бөх улсын харцага Н.Батсуурь түрүүллээ

Намсрайжавын Батсуурь 1987 онд Увс аймагт төрсөн. Увс аймгийн Ховд сумын уугуул. Жүдо бөхийн ОУХМ, үндэсний бөхийн улсын харцага цолтон билээ. Тэрбээр анх 2006 онд Ховд аймгийн баяр наадамд зургаа давж аймгийн начин, 2011 онд Дархан-Уул аймгийн 50 жилийн ойн барилдаанд түрүүлж аймгийн арслан цол хүртэж бөхийн гараагаа эхэлж байжээ. Бөхийн өргөөнд болдог барилдаануудад аварга, арслан, гарьд, заан цолтнуудыг өвдөг шороодуулж үзэгчдийг шуугиулдаг хурц дайчин, түргэн шуурхай, уран барилдаантай бөх бөгөөд 2011 оны цагаан сарын барилдааны үеэр Дархан аварга А.Сүхбат түүнд "Ирээдүйн аварга" шагналаа гардуулсан. Тэрбээр 2013 оны улсын наадамд зургаа давж шөвгөрөн, улсын харцага цол хүртжээ. Тэр жилийн наадмаар гурвын даваанд аймгийн хурц арслан Б.Одгэрэлтэй тунаж, дөрөвийн даваанд 2012 оны түрүү бөх улсын арслан П.Бүрэнтөгстэй оноолтоор таарч, тавын даваанд улсын харцага Н.Өсөх-Ирээдүйг, зургаагын даваанд аймгийн хурц арслан Л.Цэрэнтогтохтой тунаж давсан бөгөөд долоогын даваанд улсын начин Б.Батмөнхтэй тунаж барилдаад унасан юм. Намсрайжавын Батсуурь нь 2011 оны жүдо бөхийн насанд хүрэгчдийн улсын аварга шалгаруулах тэмцээнд түрүүлж "Спортын мастер", 2011 оны дэлхийн цомын аваргаас хүрэл медаль хүртэж "ОУХМ" цол хүртсэн, 2013 онд мөн жүдо бөхийн улсын аварга болсон, 2012 оны дэлхийн цомоос хүрэл, 2012 оны Азийн аварга шалгаруулах тэмцээнээс хүрэл медаль хүртсэн жүдоч юм.

Төрийнхөө их баяр наадамд түрүүлээд байгаа тэрбээр удамт бөх бөгөөд өвөө Ж.Гэлэг нь улсын начин, аав Г.Намсрайжав нь улсын харцага, авга ах химийн ухааны доктор, профессор, самбын ОУХМ Г.Даваасамбуу нь улсын начин, Г.Дансран нь аймгийн заан, Н.Баярмагнай нь чөлөөт бөхийн Ази тивийн аварга, улсын таван удаагийн аварга, ОУХМ, аймгийн арслан цолтой. Мөн олимпийн хүрэл медальт, МУГТ, улсын начин Р.Даваадалай, чөлөөт бөхийн дэлхийн аваргын хүрэл медальт, МУГТ, улсын начин Ло.Энхбаяр, улсын начин Ло.Эрхбаяр нар ээжийнх нь хамаатан. Ийнхүү үндэсний их баяр наадмаар хоёр талдаа бөхийн удамтай Намсрайжавын Батсуурь хүчит 512 бөхөөс ес даван түрүүлж Улсын арслан боллоо.

Нутаг нэгт аварга Баянмөнх шигээ аугаа тамирчин болоорой

Алдар нэгт аварга Батсуурь шигээ Дархан аварга болоорой