Улс төр
2024.10.09 14:12
1224О.Алтангэрэл: Авлигачдын хөрөнгийг хураадаг, мэдээлэл өгсөн хүнийг урамшуулдаг хуулийн төслийг ЗГ-т танилцуулсан
Т.Чимгээ, Б.Содномдаржаа нарын эрх ашгийг хамгаалах асуудлаар Олон улсын хүний эрхийн байгууллагатай хамтран ажиллах Ажлын хэсгийн ахлагчаар ХЗДХ-ийн сайд О.Алтангэрэлийг томилсон. Энэ хүрээнд тодрууллаа. Тэрээр" Эрүүдэн шүүсэн гэдэг хэрэгтэй холбоотойгоор ажлын хэсгийг ахалж ажиллах үүрэг авсан. Мөрдөн шалгах ажиллагааны үйл явцын талаар мэдээлэл өгөх боломжгүй" гэв.
Тэрээр Авлигачдын хөрөнгийг хураадаг, мэдээлэл өгсөн хүнийг урамшуулдаг хуулийн төслийг Засгийн газарт танилцуулсан гэдгээ илэрхийлсэн.
ХЗДХЯ: ХЗДХ-ийн сайд О.Алтангэрэл хүний эрхийг дээдэлсэн, авлигагүй төр, шударга ёсыг бэхжүүлэх зорилгоор Хууль зүй, дотоод хэргийн яамнаас боловсруулж буй хууль, тогтоомжийн төслүүдийн явцыг өнөөдрийн Засгийн газрын хуралдаанд танилцууллаа.
Авлигатай тэмцэхтэй холбоотой зарим хуулийн төсөл, тухайлбал Жагсаал, цуглаан хийх журмын тухай хуулийн шинэчилсэн найруулга, Хэвлэл мэдээллийн эрх чөлөөний тухай хуулийн шинэчилсэн найруулга, Хүний эрх, эрх чөлөөг хангахтай холбоотой зарим хуульд нэмэлт, өөрчлөлт оруулах тухай хуулийн төсөл, Эрүүгийн хэрэг хянан шийдвэрлэх тухай хуульд нэмэлт өөрчлөлт оруулах тухай зэрэг хуулийн төслүүдийг УИХ-ын намрын чуулганд өргөн мэдүүлэхээр төлөвлөж байна.
Эдгээр хуулийн төслүүдийг Засгийн газрын хуралдаанаар хэлэлцээд УИХ-ын даргын захирамжаар байгуулсан холбогдох хууль, тогтоомжийн төсөл боловсруулах үүрэг бүхий Ажлын хэсгийн үйл ажиллагаатай Засгийн газрын үйл ажиллагааг уялдуулах талаар зохих арга хэмжээг авч ажиллахыг Монгол Улсын сайд, ЗГХЭГ-ын дарга Н.Учралд даалгалаа.
