Bloomberg-гээс гаргасан дэлхийн хамгийн баян гэр бүлийн жагсаалтыг АНУ даяар Walmart супермаркетийн сүлжээтэй Уолтоны гэр бүл дахин тэргүүллээ. Сам Уолтон анхны супермаркетаа нээснээс хойш 60 гаруй жил өнгөрсөн ч үр хүүхдүүдийнх нь гайхалтай ажиллагааны ачаар тус дэлгүүр үргэлж өсөж, дэвжиж иржээ. Энэ онд гэхэд л Walmart-ийн үнэ цэнэ 80 хувиар өссөн байна. Bloomberg нийт 25 гэр бүлийг жагсааснаас эхний арвыг танилцуулъя.

1.    Уолтоны гэр бүл

Бизнес: Walmart супермаркет
Хөрөнгө: 432 тэрбум доллар
Улс: Америкийн нэгдсэн улс
Үе: 3

Уолтоны удам угсаа Walmart супермаркетийн сүлжээний 46 хувийг эзэмшдэг. Үүсгэн байгуулагч Сам Уолтон бизнесээ гэр бүлийн хяналтад байлгахын тулд эд хөрөнгөө хүүхдүүддээ тэгш хуваарилаж өгчээ. 

 

2.    Аль Нахяны гэр бүл

Бизнес: Үйлдвэрлэл
Хөрөнгө: 323 тэрбум доллар
Улс: Арабын нэгдсэн эмират
Үе: 3

Арабын нэгдсэн эмират улсад эрх баригч Аль Нахяны гэр бүл нефтийн наймаагаар гол хөрөнгөө босгожээ. Тус улсын долоон эмиратын нэг Абу Дабигийн захирагч Мохамед бин Зайед Аль Нахян нь мөн төрийн тэргүүн. 

3.    Аль Танийн гэр бүл

Бизнес: Үйлдвэрлэл
Хөрөнгө: 172 тэрбум доллар
Улс: Катар
Үе: 8

Аль Танийн гэр бүлийн Засгийн газар байгалийн хий, нефтийн бизнестэй. 
Аль Танийн гэр бүлийн гишүүд улс төрийн том албан тушаал хашиж, том том бизнесийг удирддаг. Гэр бүл нь өнөр өтгөн, гэвч эрх мэдэл цөөн хэдэн хүн дээр төвлөрдөг. 

4.    Гермесийн гэр бүл

Бизнес: Hermes
Хөрөнгө: 170 тэрбум доллар
Улс: Франц
Үе: 6

100 орчим гишүүнээс бүрддэг энэ гэр бүлийн зургаа дахь үеийн төлөөлөгчид Францын дээд зэрэглэлийн моодны фирмийн эзэд. Гүйцэтгэх захирлаар Аксел Думас ажилладаг.

5.    Кохын гэр бүл

Бизнес: Koch Inc
Хөрөнгө: 148 тэрбум доллар
Улс: АНУ
Үе: 3

Ах дүү Фредерик, Чарльз, Давид, Уильям Кох нар эцэг Фредээс нефтийн үйлдвэрийг өвлөж авчээ. Гэвч маргаан үүссэний дараа гэр бүлийн бизнесийг Чарльз, Давид хоёр авч үлджээ. Koch Inc компани химийн бодис, эрчим хүч, эрдэс баялаг, компьютерийн үүлэн технологи, санхүү, түүхий эдийн зах зээл, хөрөнгө оруулалт зэрэг олон салбарт ажилладаг. 

6.    Аль Саудын гэр бүл

Бизнес: Үйлдвэрлэл
Хөрөнгө: 140 тэрбум доллар
Улс: Саудын Араб
Үе: 3

Саудын Арабын хааны гэр бүл нефтийн наймаанаас гол орлогоо бүрдүүлдэг. Хааны мэдлийн Royal Diwan компанийн 50 жилийн турш цуглуулсан орлогоос энэ хөрөнгө бий болжээ. 

7.    Марсын гэр бүл 

Бизнес: Mars Inc
Хөрөнгө: 133 тэрбум доллар
Улс: АНУ
Үе: 5

Mars компани M&M's, Milky Way, Snickers зэрэг бүтээгдэхүүнээрээ дэлхийд танигдсан. Гэвч гэрийн тэжээмэл амьтдад зориулсан бүтээгдэхүүнээс компанийн орлогын тал хувь нь бүрддэг. 

8.    Амбанийн гэр бүл

Бизнес: Reliance Industries
Хөрөнгө: 99 тэрбум доллар
Улс: Энэтхэг
Үе: 3

Мукеш Амбани дэлхийн хамгийн том нефть боловсруулах үйлдвэрийг эзэмшдэг. Дэлхийн хамгийн үнэтэй хувийн орон сууц гэгддэг 27 давхар байшинд амьдардаг. Тэрээр дүүгийн хамтаар эцгийнхээ өв хөрөнгийг өвлөж авчээ. 

9.    Вертхаймерийн гэр бүл

Бизнес: Chanel
Хөрөнгө: 88 тэрбум доллар
Улс: Франц
Үе: 3

Ах дүү Алан, Жерард Вертхаймер 1920-оод онд Парис дахь Coco Chanel-ийг санхүүжүүлж байсан өвөөгөөсөө өв хөрөнгийг нь өвлөж авчээ. Вертхаймерийн гэр бүл Chanel моодны ордон, уралдааны морьд, усан үзмийн тариалан эзэмшдэг. 

10.    Томсоны гэр бүл

Бизнес: Thomson Reuters
Хөрөнгө: 87 тэрбум доллар
Улс: Канад
Үе: 3

Томсоны гэр бүл санхүүгийн мэдээлэл, үйлчилгээ нийлүүлэгч Thomson Reuters-ийн 70 хувийг эзэмшдэг. Рой Томсон 1930-аад оны эхээр Онтариод радио станц нээснээр Канадын хамгийн баян гэр бүл бий болжээ.