Тавантолгойн орд, Ухаа худагийн газартай холбоотой асуудлаар ХЗДХ-ийн сайд О.Алтангэрэл мэдээлэл өглөө. 

Тэрээр "Стратегийн ач холбогдол бүхий Тавантолгойн нүүрсний ордын ашигт малтмалын тусгай зөвшөөрлийг хувийн хэвшлийн аж ахуй нэгжид олгосон асуудалд дүгнэлт хийсэн ажлын хэсгийн мэдээллийг Засгийн газрын хуралдаанд танилцууллаа. Ингээд холбогдох шийдвэрийн төслийг боловсруулж УИХ-д уламжлахаар тогтлоо.

Ажлын хэсэг олон асуудлыг судалж үзсэн. Монгол Улсын Засгийн газрын төлөөлж Үйлдвэр худалдааны сайд "Энержи Ресурс" компанитай ашигт малтмалын тусгай зөвшөөрөл шилжүүлэх тухай гэрээт баримт бичигт 2008 оны гуравдугаар сарын 21-ний өдөр гарын үсэг зурсан. 

Тус бичиг нь стратегийн ач холбогдол бүхий төрийн хувь хэмжээг тогтоосон хууль бус зөрчилтэй гэрээ байна гэж үзэж байна. 

Тус тусгай зөвшөөрөл олгосон нь Үндсэн хууль, Засгийн газрын тухай хууль, Ашигт малтмалын тухай хуулийг зөрчсөн байна. Энэ асуудлаар УИХ 2007 онд тогтоол гаргаад Тавантолгойн орд газар тэр дундаа Энержи Ресурс компанийн эзэмшиж байсан тусгай зөвшөөрлийн талбайг стратегийн ач холбогдол бүхий орд газарт хамруулчихаад байхад энэ ордын талаар гэрээ хийж, хэн нэгэнд эзэмшүүлэх эрх нь тухайн үеийн Үйлдвэр худалдааны сайд Х.Наранхүүд байгаагүй. Эргэн танилцуулах үүргийг тус сайдад өгсөн байдаг.  Эргэн шийдвэрлүүлэхийг УИХ-аас Засгийн газар, ерөнхий сайдад даалгасан байдаг. Энэ бүх процессыг зөрчсөн шийдвэр гарсан байна гэж үзэж байна.

Түүнчлэн зарим нэг шалгах асуудал ч гарч ирсэн. Тодруулбал, анх энэ лицензийг албан тушаал эрх мэдлийн байдлаа урвуулан авсан байж болзошгүй. Эрх мэдлээ хэтрүүлж Монгол Улсад онц их хэмжээний хохирол учруулсан байж болзошгүй асуудал байна. Энэ асуудлыг хуулийн байгууллагаар шийдвэрлүүлэх нь зүйтэй.

Ухаа худаг, Тавантолгойн орд газрын яригдаж буй асуудлаар УИХ, Засгийн газраас тогтоолын төсөл өргөн барьж парламентаар өргөн барьж хэлэлцүүлэх нь зүйтэй гэдэг шийдвэрийг өнөөдрийн Засгийн газрын хуралдаанаар гаргасан. 

Энэ шийдвэрийг сайд биш УИХ гаргах ёстой. Учир нь стратегийн орд юм. Өнөөдрийг хүртэл энэ гэрээний эх хувь олдохгүй байна. Засгийн газрын хэрэг эрхлэх газрын архиваас бид гэрээг олоогүй.

Улсад учруулсан хохирлоороо энэ эрүүгийн гэмт хэрэг мөн. Гэхдээ би шүүхийн өмнөөс ярьж болохгүй. Яагаад энэ асуудлыг 17 жилийн турш огт хөндөөгүйг мэдэхгүй байна. Төрийн албан тушаалтны асуудлыг ярьж байгаа. Хувийн өмч, хөрөнгө оруулсан компанийн талаар огт яригдаагүй гэдгийг нэмж хэлэхийг хүсэж байна. Эрх мэдлээ хэтрүүлэн ашигласан сайдад заавал хариуцлага тооцно. Харин хөрөнгө оруулсан компани, аж ахуй нэгжтэй хэлэлцэж ярих ёстой гэв. 

Шууд дамжуулалтыг үзэх: