Вашингтон Киевтэй тагнуулын мэдээллээ солилцохоо больсны дараа Украины эрх баригчид Оростой хийж байгаа дайнаа зогсоохын тулд АНУ-тай дахин яриа хэлэлцээ өрнүүлэхэд бэлэн гэдгээ илэрхийлэв. Фронт дээр тулалдаж байгаа цэргүүдэд тагнуулын мэдээлэл хамгийн чухал байдаг. Ерөнхийлөгч Володимир Зеленский Цагаан ордонд очоод хэвлэл мэдээллийнхний өмнө Дональд Трампт зэмлүүлсний дараа харилцаагаа эргэн сэргээхээр чармайж байна. Тэрээр АНУ-ын лидерт захиа илгээж, ашигт малтмалын гэрээнд гарын үсэг зурах, дайныг зогсоох асуудлаар хамтран ажиллахад бэлэн гэдгээ илэрхийлэв. “Украин, Америкийн талууд дараагийн уулзалтыг зохион байгуулахаар ажиллаж байна” хэмээн Зеленский өчигдөр мэдэгдэв. Гэхдээ шинэ яриа хэлэлцээ хаана, хэзээ болохыг хэлсэнгүй. 

Өнөөдөр Брюссельд Европын холбооны дээд хэмжээний уулзалт эхэлж Украины асуудлыг хэлэлцэх гэж байна.

Киевийн удирдагч энэ уулзалтад очиж Украины, Европын аюулгүй байдлын асуудлыг хөндөнө хэмээн төлөвлөжээ. Жо Байдений засаг захиргааны үед баталсан Украинд үзүүлэх цэргийн тусламжийг Трампын шийдвэрээр зогсоогоод байгаа. “Зеленский энх тайван тогтоох хүсэлтэй байгаа эсэхэд Ерөнхийлөгч Трамп эргэлзэж байгаа. Тиймээс бид тагнуулын мэдээллээ Украинтай солилцохоо зогсоосон. Их Британийн тагнуулыг алба ч бас мэдээлэл солилцохоо зогсооно гэдгээ мэдэгдсэн” хэмээн АНУ-ын Тагнуулын төв газрын дарга Жон Ратклифф ярьжээ. 
Вашингтоны дэмжлэгийг алдах вий хэмээн айсан Киевийн эрх баригчид Москвад ашигтай байдлаар энхийн тохиролцоо хийх шахаанд орж байгаа бололтой. “Түр зуур гал зогсоох биш, дайныг бүрмөсөн дуусгах ёстой. Бид бүгд ард түмнийхээ баталгаатай ирээдүйн төлөө зогсож байна. Бидний хүчин чармайлт АНУ-ын манлайлалтай нийлбэл энэ нь бүрэн боломжтой” хэмээн Зеленский Германы лидер Олаф Шольцтой утсаар ярьсныхаа дараа Х сүлжээн дээр бичжээ.