Леди Гага хэмээн алдаршсан дуучин Стефани Жоанне Германотта энэ онд ээж болохоор төлөвлөж, хүүхдийн өрөөг хэрхэн тохижуулах талаар санаа тавьж эхэлжээ. Ямар нэг саад гарч ирэхгүй бол тэрээр энэ онд хөл хүнд болохыг хүсэж байгаагаа Elle сэтгүүлд ярилцлага өгөхдөө хүлээн зөвшөөрсөн байна. Леди Гага хүүхэд хэрхэн өсгөх тухай ном уншиж, энэ тухай мэдээлэл түлхүү сонирхдог болсныг ойрын эх сурвалж баталж байгаа аж. 
Тэрээр одоо хамтран амьдарч буй бизнесмэн, хөрөнгө оруулагч Майкл Поланскийг ирээдүйн хүүхдүүдийнхээ заяаны эцэг хэмээн үзэж буйгаа илэрхийлсэн удаатай. Тэд 2024 оны Парисын олимпийн үеэр Парист сүй тавьжээ. Леди Гага 14 удаагийн Грэмми, 18 удаагийн MTV Video Music шагналтай. Мөн Алтан бөмбөрцөгийг хоёр удаа, Британийн хөгжмийн шагналыг нэг удаа авч байв. “Би материаллаг зүйлст дургүй. Мөнгө бодож санаагаа зовоодоггүй” хэмээн ярьдаг 38 настай дуучин 900 сая долларын хөрөнгө цуглуулжээ.