Дэлхийн тэргүүн баян, Х Space, Tesla-гийн эзэн, Төсвийн хэмнэлтийн хорооны дарга Илон Маск АНУ-ын шуудангийн үйлчилгээ болон Amtrak улсын үйлдвэрийг хувьчлах хэрэгтэй хэмээн мэдэгдлээ. Amtrak нь 1971 оноос хойш хот хоорондын зорчигч тээврийг хариуцаж байгаа төмөр замын улсын компани. “Хувьчилж болох бүх зүйлийг хувьд гаргах хэрэгтэй. Бусад улс оронд зорчигч тээврийн төмөр зам, галт тэрэг яаж хөгжсөнийг хар, Хятадын жишээ байна. Манай сүлжээ хажууд нь ичмээр. Amtrak бол өрөвдөлтэй. Та өөр улсаас манай улсад зочлон ирсэн бол үндэсний төмөр замын сүлжээг ашиглахгүй байсан нь дээр. Танд тун онцгүй сэтгэгдэл үлдээх байх” хэмээн Маск Харилцаа холбооны бага хуралд онлайнаар оролцохдоо онцлон ярьжээ.
Үйлчилгээ хувьд шилжсэнээр сайжирч, шинэ түвшинд гарна хэмээн Илон Маск үзэж байна. 2013 онд Калифорниа мужид өндөр хурдны галт тэрэгний “Hyperloop” төсөл хэрэгжүүлсэн ч бүтэлгүйтсэн юм. Ерөнхийлөгч Дональд Трамп Америкийн шуудангийн албыг хувьчлах талаар нэг бус удаа дуугарч байсан.