АНУ, Украины төлөөлөгчид гуравдугаар сарын 11-нд Саудын Арабын Эр-Рияд хотод уулзахаар боллоо. Украины талаас Ерөнхийлөгчийн Тамгын газрын дарга Андрей Ермак ахалж ирэх бол, АНУ-ын төлөөлөгчдийн бүрэлдэхүүнд Төрийн нарийн бичгийн дарга Марко Рубио, Ойрхи Дорнодын асуудал хариуцсан тусгай элч Стивен Виткофф, АНУ-ын Ерөнхийлөгчийн үндэсний аюулгүй байдлын зөвлөх Майк Уолтц нар багтжээ. 
Украины лидер Володимир Зеленскийн батлан хэлж буйгаар, 11-нд болох уулзалт, хэлэлцээ нь мэдээлэл солилцох, эсрэг талын хүсэл сонирхлыг тандах маягтай болох аж. 
Өчигдөр бас нэг мэдээлэл түгсэнийг CNN агентлаг албаны эх сурвалжаас иш татан уламжлав. АНУ-ын Ерөнхийлөгч Дональд Трампын багийн дөрвөн гишүүн Украины сөрөг хүчний хүмүүстэй нууцаар уулзаж, тус улсад сонгууль явуулах боломжийн талаар ярилцсан аж. Тэд Юлия Тимошенко болон Петр Порошенкогийн намын голлох лидерүүд болон бусад улс төрийн намын төлөөлөлтэй уулзсан хэмээн мэдээлж байна. Зеленский, Трамп хоёрын Цагаан ордон дахь уулзалт бүтэлгүйтсэний дараа АНУ Украинд сонгууль явуулж, Киевийн дараагийн удирдагчтай яриа хэлэлцээ хийх арга зам хайж буй бололтой. АНУ-ын Ерөнхийлөгчийн Украин, Оросын асуудал хариуцсан тусгай элч Кит Келлог тэргүүтэй төлөөлөгчид Украины сөрөг хүчнийхэнтэй уулзжээ. Гэвч дайнтай үед Украинд сонгууль явуулахын эсрэг байгаа гэдгээ Тимошенко, Порошенко нар илэрхийлсэн байна.