
Монгол Улсын Ерөнхийлөгч Ухнаагийн Хүрэлсүх Бүгд Найрамдах Чех Улсын Ерөнхийлөгч Петр Павелын урилгаар тус улсад хийж буй төрийн айлчлал амжилттай үргэлжилж байна. Айлчлалын үр дүнд хоёр улсын уламжлалт найрсаг харилцаа, хамтын ажиллагааны түвшнийг шат ахиулж, Иж бүрэн түншлэлд хүргэлээ. Хоёр улсын харилцааны түвшин ийнхүү иж бүрэн түншлэлд хүрснээр Монгол, Чехийн хооронд эдийн засаг, нийгмийн бүхий л салбарт хамтарч ажиллах боломж нээгдэж байна.

Төрийн айлчлалын бизнесийн бүрэлдэхүүнд багтсан баялаг бүтээгчид БНЧУ-ын томоохон үйлдвэрүүдтэй танилцлаа. Тус бүрэлдэхүүнийг Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр ахалж, 108 жилийн түүхтэй мах, махан бүтээгдэхүүн үйлдвэрлэгч “Кostelecke uzeniny” үйлдвэрт ажиллав.

Тус үйлдвэр нь хоногт 150 тонн мах боловсруулах хүчин чадалтай. Энд үхэр, гахайн махаар 800-аад нэр төрлийн бэлэн бүтээгдэхүүн үйлдвэрлэж, дотоодын зах зээлийн 50 орчим хувийг дангаараа хангадаг мах, махан бүтээгдэхүүн үйлдвэрлэгч хамгийн том үйлдвэр. Үйлдвэрлэсэн нийт бүтээгдэхүүнийхээ 80 хувийг дотооддоо нийлүүлдэг бол үлдсэн хувийг нь европын орнуудад экспортлодог байна.


Тус үйлдвэр 500 гаруй ажилтантай. Үүний 200 орчим нь монголчууд. Монголчууд үйлдвэрийн бүхий л дамжлага дээр ажиллахаас гадна удирдан, зохион байгуулах ажлыг ч гүйцэтгэдэг байна.


Монгол Улсын Ерөнхийлөгч У.Хүрэлсүхийн санаачилсан “Хүнсний хувьсгал” “Тэрбум мод” “Цагаан алт” зэрэг үндэсний хөдөлгөөнүүдийн хүрээнд хүнс, хөдөө аж ахуйн салбарын аж ахуйн нэгжүүдийг дэмжих, эдийн засгийн гадаад харилцааг өргөжүүлэх, үйлдвэрлэл хөгжсөн орны сайн туршлагаас суралцах зорилготой “Баялаг бүтээгч-Бизнес аялал” эхний өдрөө амжилттай болж өндөрлөлөө.



