Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Чех Улсад хийж буй төрийн айлчлал үргэлжилж байна.

Айлчлалын хүрээнд Прага хотноо болсон Чех-Монголын бизнес форумд хоёр улсын Ерөнхийлөгч оролцлоо.

Аж ахуйн нэгжүүд уламжлалт салбаруудаас гадна дэвшилтэт техник, технологи, инноваци, ноу-хау, тээвэр ложистик зэрэг илүү өргөн хүрээнд хамтрах боломжийг эрэлхийлж, гэрээ, хэлэлцээр байгуулан, харилцан ашигтай хамтран ажиллана гэдэгт итгэл дүүрэн байгаагаа төрийн тэргүүн нар илэрхийллээ.

Бизнес форумд хоёр улсаас хүнс, хөдөө аж ахуй, хөнгөн үйлдвэр, худалдаа үйлчилгээ, уул уурхай, ашигт малмал, барилга, эрчим хүч, боловсрол, эрүүл мэнд зэрэг 20 орчим салбарын 150 гаруй аж ахуйн нэгжийн нийт 200 гаруй төлөөлөл оролцов.

Бизнес форумын нээлтийн үеэр “Монголын Үндэсний худалдаа аж үйлдвэрийн танхим, Чехийн Худалдаа аж үйлдвэрийн танхим хоорондын үйл ажиллагааны төлөвлөгөө”-нд хоёр улсын танхимын Ерөнхийлөгч Л.Төр-Од, Зденек Заийчек нар гарын үсэг зурлаа.

2024 оны байдлаар хоёр орны худалдааны эргэлт 18 сая ам.доллар байна. Манай экспорт 300 гаруй мянган ам.доллар, импорт 17 сая орчим юм.

Манай талаас ноолууран эдлэл, хувцас, сүлжмэл цамц, гэрийн угсармал хийц нийлүүлж, тэсэлгээний утас, бялт, өдөөгч бодис, цахилгаан халаах зуух, эм, эмийн бүтээгдэхүүн импортолдог байна. Тиймээс цаашид хоёр улсын худалдааны эргэлтийг тэнцвэржүүлэх чиглэлд анхаарч, уул уурхай, тээвэр логистик, техник технологи, хөрөнгө оруулалтын чиглэлд хамтын ажиллагааг идэвхжүүлэх боломжтойг бизнесийнхэн онцолж байлаа.

Энэ удаагийн төрийн айлчлалын хүрээнд зохион байгуулагдсан Монгол-Чехийн Бизнес форумын үеэр монголын долоон компани шинэ бизнесийн түншээ олж, үндэсний томоохон үйлдвэрлэгч “Талх чихэр” ХК 20 жил хамтран ажилласан түнш байгууллагатайгаа 4 сая еврогийн гэрээ байгуулж, цаашдын хамтын ажиллагаагаа өргөжүүлэв. Бизнес форумын үеэр монголын бизнес эрхлэгчид нийт 6.3 сая ам.долларын дүнтэй хамтын ажиллагааны гэрээг амжилттай байгуулжээ

Мөн Монголын Иргэний Нисэхийн Ерөнхий газар болон “Transconia Electric Systems” компанитай 100 сая Еврогийн гэрээ байгуулав.

Монгол Улсын Ерөнхийлөгчийн санаачилсан “Хүнсний хувьсгал” “Тэрбум мод” “Эрүүл Монгол хүн” “Цагаан алт” зэрэг үндэсний хөдөлгөөний хүрээнд хүнс, хөдөө аж ахуйн салбарын бизнесийн төлөөллийг тус орны бизнес эрхлэгчидтэй түншлэх, гэрээ хэлэлцээр байгуулах, бизнесийн шинэ боломжийг нээсэн үр дүнтэй бизнес форум болж өндөрлөлөө.