Өнөөдөр сүрьеэтэй тэмцэх дэлхийн өдөр тохиож байна. Энэ жил "тиймээ бид сүрьеэг устгаж чадна: Амлалтаа хэрэгжүүлье, Хөрөнгө оруулъя, Үйлчилгээг хүргэе” уриатайгаар тэмдэглэж байна. 

Ж.Байгалмаа ХӨСҮТ-ийн дэд захирал: Манай улсын хувьд сүрьеэгийн өвчлөл өндөртэй орны тоонд ордог.

2023 онд 3 мянга орчим сүрьеэгийн өвчлөл бүртгэгдсэн. Энэ нь өмнөх оны мөн үетэй харьцуулахад 5.5 хувиар буурсан хэдий ч Улаанбаатар хотод ихэнх хувь нь буюу 57 хувь, аймаг орон нутагт 42 хувь нь бүртгэгдсэн. 

Манай улс сүрьеэгийн эмчилгээ оношилгоонд дэлхийн түвшинд хүрсэн оношилгооны аргуудыг нэвтрүүлсэн. Ингэснээр сүрьеэгийн оношилгооны баталгаажилт нэмэгдэж, эмэнд тэсвэртэй сүрьеэг эрт илрүүлэх нөхцөл бололцоо бүрдсэн.  Улсын хэмжээнд өнөөдрийн байдлаар сүрьеэгийн 42 нэгжид 44 экспертийн тоног төхөөрөмж оношилгоо хийхээр ажиллаж байна. Мөн зөөврийн рентгенийг сүрьеэгийн оношилгоо, илрүүлэг хийхэд ашиглаж байна. Мөн сүүлийн жилүүдэд хиймэл оюун ухаанаар рентген зургийг унших аргыг нэвтрүүлэн ашиглаж байгаа. 

Сүүлийн жилүүдэд эмчилгээний хугацаа богиносож байгаа. Өмнө нь эмэнд мэдрэг сүрьеэг 6-9 сарын хугацаанд эмчилдэг байсан. Шинэ эмийн горимыг нэвтрүүлснээр 4-6 сарын хугацаанд эмчилдэг болсон. Мөн олон эмэнд тэсвэртэй сүрьеэгийн эмчилгээ 2 жил хүртэлх хугацаанд үргэлжилдэг байсан бол шинэ эм нэвтрүүлснээр 6-12 сарын хугацааг зарцуулдаг болсон. 

Сүрьеэгийн өвчнийг эмчлэх хугацаа богиносож байгаа нь өвчтөнд ээлтэй, уух хэрэглэх эмийн дарамт багасаж байгаа ач холбогдолтой.