Монгол Улсын Их Хурлын даргын 290 дүгээр захирамжаар байгуулагдсан “Боомтыг олон улсын жишигт нийцүүлэн төрөлжүүлэн хөгжүүлэх, боомтын хяналт, аюулгүй байдлыг хангах, байгууллагуудын ажлын уялдаа, татварын зохицуулалт, дэд бүтэц, логистикийн үйлчилгээ, боомтын захиргаанаас орон нутгийн хөгжилд үзүүлэх дэмжлэгтэй холбоотой үйл ажиллагаанд дагаж мөрдөж байгаа дүрэм, журам, хууль эрх зүйн зохицуулалтуудыг судлан, санал, дүгнэлт гаргах, холбогдох шийдвэрийн төсөл боловсруулах үүрэг бүхий ажлын хэсэг” байгуулагдсан.

 

Энэ ажлын хэсгийн гишүүд Өмнөговь аймгийн Гурвантэс сумын Шивээхүрэн боомтод ажиллаа. Шивээхүрэн боомтод “Боомтын сэргэлт”-ийн хүрээнд хийгдсэн шинэчлэл, бүтээн байгуулалтын ажлыг төр, хувийн хэвшлийн хамтын ажиллагааны хүрээнд богино хугацаанд амжилттай гүйцэтгэж чадсан. Энэ нь боомттой бүс нутгуудад сайн жишиг, шилдэг туршлага болж байгаа юм. Төр болон хувийн хэвшлийн байгууллагын танилцуулгыг сонсож, хийсэн ажлуудын туршлагыг бусад боомттой аймгуудад хуваалцах зорилгоор Шивээхүрэн боомтыг сонгож ажлын хэсгийг хуралдуулжээ.

 

Энэ ажлын хэсгийн ахлагчаар УИХ-ын гишүүн У.Отгонбаяр ажиллаж байгаа бол ажлын хэсгийн хуралдаанд УИХ-ын дэд дарга Б.Пүрэвдорж, УИХ-ын гишүүн ХББОС-ын сайд Ж.Батсуурь, УИХ-ын гишүүн Э.Болормаа, Б.Уянга, Г.Хосбаяр, Л.Соронзонболд нарын гишүүд оролцов. Мөн Монгол Улсын Ерөнхий сайд асан, Засгийн газрын Тусгай үүрэгт элчин сайд С.Баяр, Монгол Улсын Ерөнхий сайдын ахлах зөвлөх Д.Амгаланбаатар, ЗТХЯ-ны Төрийн нарийн бичгийн дарга С.Батболд, Хилийн боомтын захиргааны дарга Б.Батхишиг, Монгол Улсаас БНХАУ-ын ӨМӨЗО-ны Хөх хотод суух Ерөнхий консул Ш.Оргил, Өмнөговь, Сүхбаатар аймгийн удирдлагууд болон гааль, хилийн цэргийн төлөөллүүд томилолтоор ажиллав.

 

Өнгөрсөн хугацаанд Боомтын сэргэлтийн хүрээнд Шивээхүрэн боомтод:

- Жилд 22 сая тонн хүчин чадал бүхий нүүрс ачиж, буулгах (жолоочтой тээвэр, 5G, AGV) терминал

- Шивээхүрэн төмөр замын өртөө

- Жилд 10 сая тонн хүчин чадал бүхий нүүрс ачиж, буулгах терминал байгуулагдсан.

 

Энэ бүтээн байгуулалтын үр дүнд нүүрсний экспорт 50 гаруй хувиар нэмэгдэх боломж бүрджээ. Бүрэн хүчин чадлаараа ажилласан тохиолдолд жилд 52 сая тонн нүүрс экспортлох боломжтой. Одоогийн байдлаар тус боомтоор жилд 25 сая тонн нүүрс экспортолсон байна.