ОХУ-ын Ерөнхийлөгч Владимир Путин Украинд НҮБ-ын хяналт дор түр засаг захиргаа байгуулж тэнд сонгууль явуулах боломжийн талаар ярьсан нь АНУ-ын лидер Дональд Трампын уурыг хүргэжээ. Трамп Оросын талаар аядуу зөөлөн бодлого баримталж байсан нь уур бухимдлаар солигдлоо хэмээн NBC телевиз мэдээлж байна. “Хэрвээ Орос улс бид хоёр Украинд цус асгаруулахыг зогсоож энхийн гэрээ байгуулж чадахгүй бол энэ нь Оросын буруу байх болно. Тэгвэл Оросын нефтийн бүтээгдэхүүнд дахин хориг арга хэмжээ авахаас өөр аргагүй болно. Оросын нефтийг худалдаж авсан улс орнууд АНУ-тай худалдаа наймаа хийж чадахгүй болно” хэмээн Цагаан ордны эзэн хэлжээ. Путин Украины лидер Зеленскийн манлайлалд эргэлзэж, Украинд шинэ лидер гаргаж ирэх тухай ярьж эхэлсэн нь Трампын уур цухлыг хүргэсэн хэмээн мэдээлж байна. “Намайг уурласан гэдгийг Путин мэдэж байгаа. Гэхдээ бид маш сайн харилцаатай. Путин зөв зүйл хийвэл миний уур дорхноо гарчихна” хэмээн Трамп NBC телевизэд ярьжээ. Трамп гурван жил үргэлжилж байгаа Украины дайныг зогсоохоор хэд хэдэн уулзалт, хэлэлцээ хийсэн ч одоогоор амжилтад хүрээгүй байна. 30 хоног гал зогсоох саналыг Путин няцааж, энхийн гэрээний нэг хэсэг болж Зеленский огцрох ёстой хэмээн ойлгуулсан юм. Орос улс гэрээ хэлэлцээг сунжруулж байх хооронд дайралт, довтолгоогоо үргэлжлүүлсээр байна хэмээн Украин улс мэдэгдэв. Өчигдөр оросууд Украины зүүн хойд хэсгийн Харьков хотыг довтолжээ.