УИХ-ын гишүүн Ж.Алдаржавхлан энэ өдөр /2025.03.31/-ийн нэгдсэн чуулганы үеэр “2024 онд сургуулийн орчинд үйлдэгдсэн гэмт хэрэг 1675-аар нэмэгдсэн байна. Энэ ямар учиртай вэ?” хэмээн Боловсролын сайд П.Наранбаяраас асуулаа. П.Наранбаяр сайд хариулахдаа:

Сургуулийн орчинд үйлдэгдсэн гэмт хэргийн тоо жилээс жилд өсөж байгаа нь үнэн. Хууль зүй, дотоод хэргийн яамтай хамтраад, сургалтуудыг бүсчлэн зохион байгуулж байна. Тухайлбал, янз бүрийн бодис үнэрлэж, мансуурах нь ямар хор уршигтай талаар ухуулан таниулах гэх мэт.

Сургуулийн орчин дахь гэмт хэргээс урьдчилан сэргийлэхэд хороо болон сургуулийн нийгмийн ажилтны үүрэг оролцоо нэн чухал. Мөн эцэг, эхийн оролцоо маш их хэрэгтэй. Тухайлбал, School police хийж байгаа эцэг, эхчүүд сургуулийн орчны замын хөдөлгөөнийг зохицуулахаас гадна сургуулийн орчин дахь гэмт хэргээс сэргийлэхэд анхаарах чиглэл өгч байгаа

Насанд хүрээгүй иргэд өртөж байгаа гэмт хэрэг нь дотор цахим орчинд хурдацтай өсөж байгаа. Тухайлбал, хүүхдүүд бие биеэ дээрэлхэх, ялгаварлан бөөрөлхөж, ганцаардуулах үзэгдэл газар авсан. Иймээс хүүхдийг 16 нас хүртэл нийгмийн сүлжээнд нэвтрэх эрхийг хязгаарлах Австрали улсын туршлагыг судалж байна. Үүгээр дамжуулж, цахим орчинд эрүүл үзэгдэл бий болгох боломжтой гэж харж байна.

Z үеийнхэн хоорондоо харилцан бичсэнийг уншихад бараг 50 хувийг нь ойлгохгүй хэмжээнд хүрсэн. Тэдний сэтгэлгээ маш их өөрчлөгдөж байна. Тиймээс сэтгэхүйд нь таарсан үйл ажиллагааг явуулж, тэдэнд хүрэх нь чухал гэв.