УИХ-ын энэ өдөр 2025.03.31/-ийн нэгдсэн чуулганаар “Монгол Улсыг 2021-2025 онд хөгжүүлэх таван жилийн үндсэн чиглэл, Монгол Улсын Засгийн газрын 2024-2028 оны үйл ажиллагааны хөтөлбөрийн 2024 оны гүйцэтгэлийн тайлан болон Монгол Улсын хөгжлийн 2024 оны төлөвлөгөөний гүйцэтгэлийн тайлан”-г үргэлжлүүлэн хэлэлцэж, УИХ-ын гишүүд Засгийн газрын гишүүдээс асуулт тавьж, асуултдаа хариулт авч байна.

Энэ үеэр УИХ-ын гишүүн Л.Соронзонболд  “Зүүн бүсэд малын хулгай их гарч байна. Нэлээд өндөр зохион байгуулалтад орсон байна, эзэд нь олддоггүй. Малын хулгайн гэмт хэргээс урьдчилан сэргийлэх талаар ямар арга хэмжээ авч байна?” хэмээн Хууль зүйн сайд О.Алтангэрэлээс асуулаа. О.Алтангэрэл сайд "Эрүүгийн хуулийн тусгай ангийн 17.12-т холбогдох малын хулгайн гэмт хэрэг зүүн бүс дээр яригддаг. Зүүн аймгуудад мал хулгайлах гэм  хэрэг нэлээд цогц зохион байгуулалттай хийгддэг. Тиймээс энэ бүс нутагт гарч байгаа малын хулгайг таслан зогсоох чиглэлээр онцлогт нь тохирсон арга хэмжээ аваад, эхнээсээ хэрэгжүүлж байгаа. Ц.Сандаг-очир гишүүний санаачилгаар зүүн бүсэд Гэмт хэргээс урьдчилан сэргийлэх талаар хурал, уулзалт зохион байгуулахаар төлөвлөсөн байгаа." гэсэн хариулт өглөө.